Vawiin March ni 11, 2024 (Thawhtanni) hian Mizo Hnam Run chhung inkhawm neih a ni a. Hun hnihnaah Pu C. Lalrosanga, MP (LS) chuan thusawiin, “MP inthlan kan hmachhawn turah rilru fim tak pu a, ngaihtuahna thar kan hman a tul hle. Central politics thlirin, BJP/NDA thawm a lian hle a. Hma an sawn zel a. Anmahni phei chuan seat 400 dawn an lak theih an in beisei hial a ni. Inthlan puan anih hma hian ‘Citizenship Amendment Act’ hi rules an peihfel thawkhat tawh avangin, implement ngei an tum niin alang a. Zoram mipuite pawhin kan rilru kan lo siam lawk atul hle a ni”, a ti.
Pu C.Lalrosanga chuan Parliament House chungchang sawiin, BJP/NDA te chu an duh ang Bill siamin, an passed pawp pawp mai a. Manipur chungchangah thusawina hun min pe ve duhlo a. Kan zawhna pawh min chhang ngailo. NDA meeting ah pawh thusawina hun min pe duhlo a. All party meeting-a kan thusawi ve pawh engah mah an ngailo. House-ah thusawina hun min pek duhloh avangin media-ah kan auchhuak vak thung thin a ni. Hnam thila nghet taka kan ding a huai taka kan auchhuah avang khan, vawiin thlengin ka la inchhir lo, kum 1950 hnulamah 17th Lok Sabha hi sitting tlem ber tum a ni a, sitting neih tumin in au buaiin hun kan hmang zo deuh zel a. Thusawina hun chan a harsa em em a ni, a ti.
Lok Sabha MP chuan, kan hun chhungin state sorkar thil bakah, state leh mimal harsatna tamtak kan buaipui ve thin a. Inbiak pawhna leh inkal pawhna te hi ka ngai pawimawh hle a. Ramria inbiak pawhna thalo chungchangah pawh hmalak mek a ni. Party, ram leh hnam leh mipuite tana theihtawp kan lo chhuah ve naah hun harsa leh khirh tak tak kan paltlang fo a. Pathian in min hruai zel thin a ni. MP inthlan lo awm turah, mifel, tha leh thiamzawk te kianin, kan hotute hnenah chawlh ka dil a ni, a ti bawk.
Mizo Hnam Run chhung inkhawm hi Pu Phairothanga, Adviser MNF Gen.Hqr. chuan kaihruaiin, Pu Ramzauva, Adviser, MNF.Gen. Hqrs. chuan hunserh a hmang bawk.
