Aizawl 11th March, 2024 :_ Vawiin khan ZPM Party President Pu Lalliansawta chuan Party chhung inkhawmah 2024 Lok Sabha MP Election lo awm tur atana Party Candidate turin Pu Richard Vanlalhmangaiha (Richie) chu ruat a nih thu a puang a, Mizoram mipuiten lungrual taka lo vote theuh tur leh ZPM Party-a, Block leh Unit hruaituten thahnem ngai taka lo thawhpui turin a sawm.
Pu Richard Vanlalhmangaiha chuan thu sawiin, “ MP Candidate tur hiala min vawrchhuak ta hi ka tan chuan chona lian tak a ni rualin MP nih hi ka hmathlir ruk ve fo a ni thin a, ka huphurh rualin kan Chief Minister Pu Lalduhoma kaihruaina hnuaia kalphung thar mipui sawrkarah min beiseina ang hlenchhuah ngei ka tum dawn a ni. Chumi ka tihhlawhtlin theihna tur chuan Mizoram mipui zawng zawngte in vote hlu tak min pe turin in khawngaihna ka dil a ni,” a ti.
ZPM Party-in MP Candidate atana ruat Pu Richard Vanlalhmangaiha hi kum 1978 khan Gorakhpur, Uttar Pradesh-ah Pu Lalzawma (Wing Comander retired) leh Zorengpuii (L) inkarah a lo piang a, a pu Dr.Rosiama (L) hi Mizo District Council-a Chairman hmasa ber a ni a, a pi L.Thanmawii (L) pawh Mizo hmeichhe zinga MLA-a thlantlin hmasa ber a ni. A nupui hi C.Lalhmingmawii a ni a, tunah hian Venghlui, Aizawlah an chhungkuain an khawsa mek a ni.
Zirna lamah chuan Pu Richie a hi ST.Edmund’s School Shillong chhuak a ni a, Hrangbana College atangin B.Com a zir zo bawk. Mizo tawng, bakah English leh Hindi-te hi pianpui tawng ang maiin a hmang thei a. Eizawnna lamah chuan MAMCO-ah Assistant Manager a ni thin a, kum 2015 khan Early Retirement a chhuakin a hmathlir tha takte thawk thei turin a intuaihriam chhova, Entrepreneurship lamte luhchilhin eizawnna chi hrang hrang a thawk a. Hnahlan Grape Growers Society-te tan Market Intervention Scheme (MIS) hmangin cheng vaibelchhe engemawzat a hnuhchhuahsak tawh nghe nghe.
Pu Richie-a hi Kohhran leh khawtlanga mi inhmang tak a ni a, Venghlui Presbyterian Kohhranah Thuhriltu leh Puitling Sunday School Secretary hna a chelh mek a, kum 11 chhung zet Branch KTP-ah OB niin KTP Venghlui Branch leh Venghlui Pastor bialah Secretary leh Leader hna a lo chelh tawh a ni. Tin, Venghlui Branch YMA-ah Secretary leh Treasurer hna te lo chelh tawh bawk. Pu Richie-a Pi leh pu atang renga ram hruaitu leh politics-a tuimi an ni a, an hnung zuia ram tana theihtawp chhuah turin a rawn penchhuak a ni. Mizoram ei leh bara intodelhna tur a veiin a ngai pawimawh hle a, chung zingah chuan thingtlang lo neih tihrehna atana Permanent Farming siamte, Lo neitute thlai thar hralhchhuahna tur leh vawn thatna tur lamte, lo neitute thlai thar sawngbawl dan tha zawk ruahmante, Rice Mills siamte, thalaite eizawnna tur kawng kawhhmuh bakah District tina JNV School dinte leh artui leh arsa-a intodelhte a ngaipawimawh hle a ni.
