Tukin khan Saitual naupang Samuel Lalbiakhlua, kum 11 S/o MS Dawngzuala chu khawvela Paragliding zirna sang ber dawttu Bir-Billing, Himachal Pradesh hmunah thlawkin tha takin a tum thei a. Hriat theih chinah hetianga thlawk thei khawvel huap pawha naupang ber a nih beisei a ni.
He hmuna zir tur hian kar hmasa inrinni 9.3.2024 khan Mizoram chhuahsanin Himachal Pradesh a Bir-Billing hmun an pana, Pathianni atangin thlawh zir tanin, kar khat pawh a zir tlin hmain tukin Inrinni zing khan a ma tawkin a thlawk chhuaka, buaina leh harsatna awm lovin leiah a tum leh thei a. A chanchin hian ngaihven a hlawh thar hle.
Ruahmanna a kal tluan chuan paragliding course hrang hrangah P2 ni turin vawi 5 vel thleng thlawh a ngai a. Samuel-a hian vawiin tlai hian khaw awmdan leh thlr kal dan a zirin a vawi hnihna atan a thlawk chhuak leh ang.
Inrinni zinga Samuel-a a thlawh chhuah dawn hian Chief Instructor chuan, kum lama ala naupan em avang leh hlauhthawnna a neih avangte, vansanga a thlawh laia a a buai a hlauh vangte in thlawk chhuak thei lo turin thu a lo pe a. Amah kaihruaitu Zaithanmawii hian Chief Instructor hnenah, Mizo naupang a nia, a buai lo ang, a tih tlat avangin thlawhchhuah tir a ni leh ta a ni.
A mah kaihruaitu hi Mizoram Paragliding Association a an hruaitu Zaithanmawii a ni a. A ni hian Samuela-a hi hetiang lam zir thei tura a hriat avangin hetianga kaihruai hi a ni.
Thudawn danin Samuel-a hian School a luh hma kum 6 mi chauh a nih laiin ft.60 a sang atangin hrui hmangin a uaithla (rapelling) thei tawh a. Kum 8 mi a nihin Mawmrang kham sang lai atangin a ma tawkin a uai thla thei tawh bawk a ni.
Tun dinghmunah hian Himachal Pradesh hian Paragliding pilot kum 13 mi an nei mek a, hei hi Samuel-a hian hemi a khum thei dawn a. Hriat theih chinah India ramah Paragliding Pilot naupang ber nia hriat a ni a. Khawvel huap pawhin glider pilot naupang ber a nih rin a ni.
