Aizawl April 9 : Pu Lalduhoma, Leader ZPM chuan Lengteng Constituency huam chhunga Pawlrang, Hliappui, Chhawrtui, Puilo leh Vancheng, Dulte, leh Kawlhlkulh khuate a tlawh kual a, he hunah hian khawtinah vantlang inkhawm neiin khawtlang mipuiin an hlut thei hle niin ZPM chuan thuchhuah a siam.
Pu Lalduhoma chuan, “ZPM chuan kan policy hi kan dinchhuahpui ngam a, kan tlakpui ngam bawk a ni,” a ti a. “Kan sawrkar chuan party sawrkar a ni dawn lo, mipui sawrkar a ni dawn a ni,” a ti bawk. “Kuthnathawktute Sawrkarin hnung min chhawn a, Agriculture Department leh Agriculture Minister chu awm ve bawk mah se ruahmanna leh budget an siamin thingtlang kuthnathawktute min huam ve ngai lo a ni. Keini ZPM erawh chuan hlawk zawk leh mumal zawka kut hnathawktuten hna kan thawh theihna turin hma kan la anga, kawng kan inkawhhmuh dawn a ni,” a ti bawk.
Pu Duha chuan, “Kan ramah hian ram awl chhawr ṭangkai loh kan la ngah em em a, hengte hi kan sawrkar chuan “Zau System” kan intoduce dawn a, chumi-ah chuan farm village kan din anga, thlai chin bik kan nei dawn a ni; chutah chuan, electric-te, tui te, school-te kan din anga, kawng ṭha tak kan siam dawn bawk a ni. Chutichuan, kumtina lo neih insawn ngai lovin eizawnna ngialnghet kan siam dawn a kut hnathawk mi taima tawh phawt chu bâna kaih policy hmangin kan inkaichhuak dawn a ni,” a ti.
Pu F. Rodingliana, Consultant, ZPM pawhin thusawiin, “Kan ram hi politics kal sual avangin a chhe zawngin a thang mek a, heng kan hmingchhiatnate leh kan retheihnate hi politics aṭang vekin siamṭhat a ngai a ni,” a ti a. “Ṭhalai lehkhathiam rualte anmahnia an dinchhuah theihna turin bul kan ṭansak ang a, rethei leh hausa inkar zau tawh lutukte hi Kalphung Thar hmangin kan siamṭha dawn a ni,” a ti bawk.
Pu Lalduhoma hian Lengteng Constituency huam chhung khaw 14 atangin ZPM ah mi thar duhawm tak tak 1030 a lawm lut a, ZPM Leader hi Pu F. Rodingliana, Consultant, Pu Saiṭhuama, General Secretary leh Headquarter atangin hruaitu ṭhenkhatten an ṭawiawm a ni.
