Hachhek 4th April 2024: Hachhek bialtu MLA & MNF Adviser Robert Romawia Royte chuan a bial chhung khaw hrang hrang fangkualin Lok Sabha MP inthlan tur atan a campaign mek a.Vawiina Darlak,Tuidam leh Kawrthah a tlawhnaa a thusawina hmun hrang hrangah a bial mipuite chu Lok Sabha MP thlang turin ngaihna fim tak hmang tur leh party politics dahbovin Kohhran, Ram leh Hnam leh hnuaihnung leh tlem zawkte humhalh ngam Pu K.Vanlalvena vote theuh turin a sawm.
Hachhek bialtu MLA Robert Romawia Royte chuan Pu K.Vena chu Mizo mai nilo North East Tribal dangte pawhin an ngainat leh an thlamuanpui em em a ni a ti a, Pathian tih em emtu,mi rinawm leh huaisen;sum leh a nundanah sel tur awm lo hi Mizoram aiawhtu atan a tha ber tih hriat chian sa hi vote theuh ang u a ti.
Hachhek bialtu MLA chuan ZPM Sorkar chu sum enkawlah an fail tih sawiin ni 100 chhungin Mizoram sum lakluhna lianber Goods and Services Tax(GST) atanga sorkar sum lakluh chu nasa takin a tlahniam a.Kum 2023 February a Mizoram in GST atanga sum a lakluh chu 14%(-14%) in a tlahniam a.March 2024 ah phei chuan March 2023 aiin 29% (-29%) in a tlahniam ta duai a ni,March 2024 a States & UTs GST Report tharberah chuan Mizoram chiah hi India ram states leh UTs te zinga GST tlakhniamna awmchhun a ni a ti.
Hachhek bialtu MLA chuan a biala Hmunphiah hralhna hrelote tawrhna chu hmuh hrehawm a tih thusawiin Assembly Session-ah meuh pawh sorkar hotuten idawt an sawi thin chu pawi a tih thu a sawi bawk.
