Aizawl, April 11 : Vawiin khan Fire & Emergency Services Department chuan an hmunpui F&ES Hqrs. Conference Hall, Hunthar-ah ‘Special Training & Awareness Programme for Mediapersons on Fire Saftey & Fire Prevention’ an buatsaih a. He Media Training & Awareness Programme F&ES Director Pu C. Lalthanmawia, MPS kaihhruaiah hian I&PR Director Pu C. Lalnunkima, MIS chu khuallian a ni.
Media person-te lawmna thu sawiin F&ES Director Pu C. Lalthanmawia chuan kangmei chhuak thei laka inven dan leh fimkhur dan tur inhrilhhriat theihna hmanrua chak leh tangkai ber chu media a nih avangin F&ES Department leh MJA Gen. Hqrs. te tangkawpin Media Awareness Programme an huaihawt thei chu a lawmawm hle a ni a ti. Nikum nena khaikhin chuan kuminah kangmei chhuak a ziaawm viau a; F&ES Department hmanrua neih leh force-te an indaih loh em avangin hmun tam takah kangmei a chhuahin an veng seng lova, chuvangin mipui lam pawhin kangmei chhuah palha tih tur leh tih loh turte an hriat a, Fire Department thlen hma a hma lo lak dan turte inzirtir a pawimawh hle a ni a ti bawk.
Media Awareness Programme-a khuallian I&PR Director Pu C. Lalnunkima chuan thu sawiin hmanrua leh force lam tlachham chung pawhin F&ES Department chuan Mizoram khawi hmunah pawh kangmei laka mipuite an him theih nana theihtawp a chhuah thin avangin ngaihsan leh zah an hlawh a, chawimawi an phu a ni a ti. Mizoramah chuan disaster lian lirnghing angte tawk rih lo mah ila, leimin leh kangmei hi kan tuar zing deuh a, kangmei bikah hi chuan mipui lam fimkhur tawk loh vanga chhuak a tam ber a; in leh lo din duhdanah pawh hian Mizote chu hmasawnna tur ngah tak, a bik takin kangmei chhuak thei laka mahni in leh lo ven thatna chang kan la hre lo deuh a ni a ti bawk. India ramah ‘National Fire Services Day’ hi 14th April, 1944 atanga hman tan a ni a, kumtin rampumah kangmei avangin mi 2,5000 velin nunna an chan thin a, kangmei avanga bungrua kangral thin zat chu cheng vaibelchhe 2700 man hu vel a chhut a ni tih a tarlang a. Mimal in leh dawrte bakah sorkar office leh building hrang hrangah te kangmei chhuak laka invenna tur emergency exit leh fire extnguisher-te intodelh a pawimawh hle a ni tih a sawi bawk. Kangmei laka inven dan turte, fimkhur dan turte chu inzirtirin englai pawhin mipuiten a zau thei ang bera an hriat theih turin publicity leh demonstration lam pawh uar takin kalpui thin a ni a, amaherawhchu fimkhur loh vanga kangmei tichhuakte leh dan bawhchhiate hrem leh chawi tir (fine) kawngah hmalak chak tawk lohna hian inthlahdahna a ti punlun nia a hriat thu a sawi a. Sorkarin man tlawm zawka fire extinguisher a hralh thin ang khan hralh leh turin hmalak thar nise chu chuan mipui tan awlsam zawka mahni in leh lote kangmei laka venna tur heng hmanruate lei theihin a awm theih a beiseiawm a ti a. Media-ten an chanchinbu leh electronic media hrang hrang kaltanga mipuite kangmei laka fimkhur leh inven dan tur an hrilhhriat thin hian F&ES Department te tanpuina zel a ni tih hriain a hma aia nasa lehzuala mipuite hrilhhriat lamah tan la turin a chah a ni.
MJA Gen Hqrs President Pu C. Lalrambuatsaiha pawhin thu sawiin Mizote hi inchhiar zau viau anga lang siin kangmei laka fimkhur dan tur leh inven dan tur lampangah hian kan hre tamin kan practice lo viau mai a, hei hi kan hmasawnna tur kawng lian tak a ni a ti. Ram changkang zawkah chuan in sak dawn pawhin thildang tam tak karah kangmei laka an invenna tura ruahmanna tha tawk an siam em tih chu thuneitu ten an endik thin a. Hei hi Aizawl khawchhungah AMC-in khauh lehzuala kalpui a tum mek laiin mipui lam zawk hian an hre tam tawk lo nia a hriat thu a sawi. Fire Department hna hi hna hautak a ni a, ram leh mipuite tana tangkai leh inthlamuanna ber pakhat an nih avangin an hmalakna zel turah pawh duhsakna a hlan a ni.
Fire & Emergency Services Department hi 1st September, 1972 khan Aizawl Police Station chhawng chung berah Aizawl Fire Station tiin bul an tan a. Kum 1992 atang khan SP hnuaiah Unit khat angin an awm tan leh a, 1998 atangin Fire & Emergency Services Department puitling angin an awm tan a ni. Kum 2008 atangin Mizoram Police hnuai atang indangin Home Department hnuaia Directorate 6 awm zingah pakhat ni vein tunah hian Director-in a thutchilh a ni. Mizoramah Fire Station 14 a awm a, a thawk hi mi 184 an awm a. Kangthelh motor lian (fire tender) 33, fire bike 2 leh fire fighting vehicle chi hrang hrang 35 a nei a ni. Aizawl khawpui chhungah fire hydrant (a lian) 41 bun a ni a, Veng hrang hrangah YMA te enkawl mek small fire hydrant (a te chi) 400 a awm mek bawk.
