Thlahnih dawn LADC a Sorkar a kal mumal theihloh hnu, Thla khat leh a chanve chhung Lai Autonomous District Council chu Governor in enkawl lailawk tura a ruat Caretaker Lawngtlai DC in a enkawl hnu ah nimin khan INC, MDC 1 leh MNF, MDC 12 ten an din United Legislature Party chuan Congress Member, Lungpher South bialtu MDC C.Lalmuanthanga hovin Sorkarna an siamtheih thu Governor hnen ah Caretaker Lawngtlai DC, Cheemala Siva Gopal Reddy kaltlangin an thlen.
Lai Autonomous District Council ah MNF Legislature Party Sorkar, V.Zirsanga kaihhruai chuan thlawptu a ngah tawklo tih a hnu deuha Lairam Democratic Alliance invuah MDC 13 ten Governor hnenah an thlen hnu ah kumin March 7 khan Governor chuan LADC ah CEM nilaiin thlawptu a neihdan fiahturin Floor Test neitura a tih laiin, hemini veka LADC Session tan hma deuhvin CEM nilai V.Zirsanga chuan CEM atanga banna a thehlut a, hemi hnu hian LADC ah Sorkarna siamthei an awm mailoh vangin Governor chuan LADC thuneihna laksakin enkawllailawkturin Lawngtlai DC chu March 15, 2024 khan a ruat a, Caretaker in thla khat leh a chanve a enkawl hnu ah vawiin chawhmalam khan INC, MDC 1 leh MNF, MDC 12 te chuan LADC ah INC, Member C.Lalmuanthanga kaihhruaina hnuaiah Sorkarna an siamtheih thu hi Governor hnen ah Caretaker Lawngtlai DC kaltlangin an thlen.
Caretaker Lawngtlai DC chuan an thuthlen chu Governor hnen ah a lo thlen nghal tur thu a lo hrilh a, hemi hnu hian United Legislature Party te chuan LADC Chairman VL Hmuaka hmuin Sorkarna an siamtheih thu hi an thehlut bawk.
Lai Autonomous District Council ah hian Elected Member 25 awmin, Chandmary bialtu MDC, Dr..Lorrain Lalpekliana Chinzah chu Assembly inthlanpui ah Lawngtlai East bial atangin ZPM Ticket in MLA atan thlantlin a nih hnu ah, Chandmary bial a chhuahsan a, tun dinhmun ah LADC ah Elected Member 24 awmmekin, kumin April 8 khan MNF, MDC 7 ten MNF Party an chhuahsan a, heng MDC 7 te leh BJP leh ZPM, MDC pakhat ve ve leh Independent Member 2 an vaiin Member 11 chu Lairam Democratic Alliance lam ah awmin, tun dinhmun ah United Legislature Party chuan Member 13 an nei mek a ni.
United Legialature Party te hi Lawngtlai West MLA C.Ngunlianchunga leh State Sorkar hmasa a Deputy Speaker H.Biakzaua ten tawiawmin, LADC ah Sorkar piang maithei lo chu ram mipuiten an tawrh nasat vangin MNF leh Congress chuan mipui tawrhna thlengzel tur ngaingam lovin Sorkar siamdun an remti tih The Lawngtlai Post an hrilh.
LADC ah Sorkarna an siamtheih thu Governor hnen a thlenna ah hian United Legislature Party a MDC 13 ten hming an ziakhnanna lehkha pawh thiltel bakah Caretaker an hmuhna hian MDC 13 hi an vaiin an tel.
United Legislature Party chuan an hruaitu atan
Leader – C. Lalmuanthanga
Dy. Leader – Sanghuliana Mualchin
Secretary – H. Lalmuansanga
Treasurer – Lalropuia Chinzah te an thlang.
Leader – C. Lalmuanthanga
Dy. Leader – Sanghuliana Mualchin
Secretary – H. Lalmuansanga
Treasurer – Lalropuia Chinzah te an thlang.
