May ni 2, 2024 (Ningani) khan Excise & Narcotics Minister, Lalnghinglova Hmar hovin Central YMA Office Bearers te leh Excise & Narcotics Department chuan Zu leh ruihhlo dona kawnga hmalak dun dan tur sawi hovin meeting an nei.
Meeting-ah hian Lalnghinglova Hmar chuan, “Mizoram hian zu leh ruihhlo vangin harsatna a tuar nasa tawh hle a, hemi do tur hian Excise & Narcotics Department leh Mizorama pawl lian ber, Central YMA chuan hma kan lak dun zel a pawimawh a, Chutianga thawhhonaah chuan hmun hrang hrang atanga zu leh ruihhlo rawn lut tur dan theih a ni a, a dapchhuahna chungchangah te thawkho zelin, YMA bakah, sawrkara department dangte, kohhran hruaitute pawh thawhpui zel an la ni ang,” a ti.
Z. Lalhmangaiha, Commissioner, Excise & Narcotics Department chuan, “Tun hnaia Burma ram buai vanga ral tlante avangin Phunchawng leh a chhehvela zu siamna a pun belh bakah, Aizawl hmun hrang hranga Hotel leh Restaurant thenkhata ualau taka lo chelek thin an awm nia sawi pawh enzui a ni ang. Zu leh ruihhlo dona kawngah chuan Central YMA emaw pawl hrang hrang dangte chu Excise & Narcotics department-in a thawhpui zel thei,” tiin a sawi.
Lalhmachhuana, President central YMA pawhin, “Zu leh ruihhlo hluar zel hi mipuiin ‘Ngaia an neih’ mai a hlauhawm. Chuvangin, hetianga khawsate hian “Hlauh an neih” a tul. Chuvangin zu leh ruihhlo laka fihlimna tur thu !eh khuahkhirhna thu hi a tam thei ang ber mipuite hriatah puanzar a ngai a ni,”a ti.
He Ruihhlo dona chungchanga inkawmkhawmnaah hian Peter Zohmingthanga, Joint Commissioner of Excise & Narcotics leh H.F. Lalrinpuia, Secretary Kumpuan Committee & CEC Member, CYMA chuan report an pe a, Lalramsanga Sailo, Secretary to Govt. of Mizoram, Excise & Narcotics chuan lawmthu a sawi a ni.
