Vawiin ni 3 May 2024 a Congress Party chuan Congress Bhavan-ah ‘Friday Political Session’ an hmang a. He hunah hian MPCC Senior Vice President Lalnunmawia Chuaungo chuan thu sawi in, “Politic a kan luh chhan hi a in ang vek lovang, thenkhat chuan dinhmun siam nan te, thenkhat chuan inhaivur nan te, thenkhat chuan ram rawngbawlnan te a ni. Politic a thlantlin te hi anmahni leh an chhungte inhaivur a, hamthatna an dawnna tur a ni lova, ram leh hnam hmasawnna tur, mipui ten hamthatna an dawnna tura thlan tlin an ni thin. Keini pawhin chutiang rilru chu kan put a, ram rawngbawlna kan ngaihpawimawh ber a ni tur a ni. Dan hi a pawimawh a, dan a lal chuan mipui ten zalenna an nei thin. Mi tlemte hamthatna tur ni lova, mipuite hamthatna tura rorelna kalpui hi democracy in a tum pawh a ni.
“Kan hnung lawka MLA inthlan ah khan ‘Congress nilo, MNF nilo’ tih Slogan kha a lar hle a. Congress sawrkar pawhin thil tha tih tamtak kan nei a, thawk tha pawh kan inti. MNF pawhin thawk tha an inti em em mai a ni. Chutih lai chuan kan rawngbawl sak te hian eng angin nge min ngaih tih a pawimawh a ni.
“Kan sawrkar kal tawhte kan duhkhawplohna emaw, kan lungawilohna tawngka kan hre tam hle a. ZPM pawhin chu chu an sawi nasa a. An auhla pui Congress nilo, MNF nilo tih chu an sawrkar pui ta a ni. ZPM sawrkar kalsual leh tihdikloh avanga sawrkar kan tum tur a ni lova, keimahni’n hmachhawp kan neih hmanga mipui kan hneh a, chumi hmanga sawrkar chu kan tum tur a ni.
“Political Will a awm a, thil tha duhna a awm chuan mi tamtakin duh lovin, dodal thin mahse a hlawhtling thin a, hamthatna dawngtu pawh mipui te an ni a, mipui ten an chhawr thin. Ram rorelna hi tihtak tak na nen Congress hian I bei ang u tiin ka sawm che u a ni.
