Mizoram Pradesh Youth Congress Committee chuan vawiin (4th May,2024) khan Aizawl Press Club-ah chanchinthar lakhawmtute kawmin, “April ni 29,2024 Thawhtanni a MPYCC ten Chief Minister Pu Lalduhawma hnena lehkha a thehluh tuma CM in a sawi, Video ah pawh in lo hmuh ‘Mizoram Private Placement Agencies (Regulation) Act , 2015 hi a felhlel, a bilh a tho lo’ ti a a lo sawi mai kha MPYCC chuan mak a ti hle a. He dan Chapter I, Section-2, Sub-Section (h) ah chuan ‘Private placement Agency’ means a person or body of persons other than a Goverment Agency, Department or organization engaged in the business of providing works to any women as domestic worker beyond the boundaries of Mizoram; tiin a inziak a. Hetah hian CM chuan, “Beyond the boundaries of Mizoram” tih chu la vawngin, ‘Placement Agencies ten Mizoram pawn khawi hmunah pawh hna thawk turin thawnchhuah theihna an nei a, chuvangin Agencies te hian an duh duhna hmunah an thawn chhuak thei a, an thiam loh a ni biklo, an sual vang a ni biklo’ a lo ti anih kha, hei hi hemi issue hi divert a tumna angah a ngaih theih a ni,” an ti.
MPYCC chuan, “He dan dikhlel leh a bilh a tho lo anga a puhna hi belhchian dawl lo a ni. He dan a Mizoram pawn a huap avanga dikhlel anga a sawi hi a dik lova, Mizoram pawnah Placement Agency te hian placement an tih theih ngei a ngai zawk a, Mizoram pawna Placement an tih theih nan ‘Beyond the boundaries of Mizoram’ tiin Mizoram sawrkarin dan a lo siam zawk a ni. Chutih lai chuan India ram pawn, Foreign a hnathawktu tur thawn chhuak a, placement tih chungchang erawh chu India sawrkar laipui thu a ni a, Indian Constitution a Seventh Schedule hnuai a Union list ami a ni. Mizoram sawrkarin thuneihna a nei lova dan pawh a siam thei lo.
“He Mizoram Private Placement Agencies (Regulation) Act , 2015 Chapter VI, Section 11 ah chuan “Act in addition to any other Law,- This Act shall be in addition to and not in derogation of any other laws for the time being in force.” tiin a inziak a, he dan hian dan awmsa a luahlan lova, dan awmsa zawm tho tur a ni tih a tarlang a ni. Chu chuan India ram pawna hnathawktu thawnchhuak tur chuan Ministry of External Affairs hnuaia Protector General of Emigrants office-ah an in register a, Registration Certificate an neih a ngai a ni. Chuvangin he dan hi a dikhlel, a bilha tho lo tih hi a dik lo a ni.
“Section 8, Sub-section (3) ah chuan hmeichhia, kum 18 tling lo hnathawka thawnchhuah khap tlat a ni. Agency Hmeichhe naupang kum 18 pawh tlinglo Dubai a thawn tute hian he dan hi an bawhchhe ngei a ni. Hei bakah hian midang passport hmanga an kaltir lehzel hi dan bawhchhiatna serious tak a ni a, human trafficking a ni bawk a, a case hi a serious hle a ni.
“Hmeichhe naupang pahnih, Dubai Jail a thla 7 an tantir te tirtu Agency te hian dan an bawhchhe ngei a, chu chu thil chiang tak a ni, a hremna pawh he Mizoram Private Placement Agencies (Regulation) Act , 2015 Section 9, Sub-section (2) ah chuan section 8 dan an bawhchhia anih chuan hremna kum thum thleng lungina khung emaw, cheng singnga thleng chawi tir emaw, a pahnih pawha hrem theih a ni. He dan Section 14 ah pawh he dan an bawhchhia anih chuan ‘Offence to be Cognizable and Non-Bailable’ a ni.
“Hetiang a nih laia kan CM, Mizoram mipuite hotu leh pa berin a fa anga a en tur hmeichhe naupangte, tanpui ngai em em te pawh ngaituah lova, dan bawhchhia a kum tlinglo, dan bawhchhia a Dubai a thawntute tan zawk anga lang a, an thlavang rem leh rem lova a hauhsak mai hi a dik lova, anmahni hum tum anga a tawng hi Congress Thalai te chuan dikna (rule of law) rahbeh tumna ni ngeiin a hria a ni. He Agency neitu, CM te awmna veng Chawlhmun mi, dan bawhchhe tute nen hian inzawmna thuk tak an lo nei em ni? a campaign fund te an lo tum sak ve em ni? Thenkhatin Agency neitunu pa hi kan CM Campaigner a ni tia an sawi te hi a dik ta mai em ni ? tih a zawt a, he dan Mizoram Private Placement Agencies Act , 2015 hi a felhlel nilovin, Kan CM zawk hi a felhlel a ni lo maw ? tih hi MPYCC zawhna a ni,” an ti bawk.
