Tun hnaiah sava vang tawh tak Vanga leh Vahrit thi tawh thlalak social media ah a darh avangin Forest Department chuan FIR an thehlut.
Aizawl Wildlife Division-a Deputy Conservator of Forest Pi Margaret Lalramchhani sawi danin, Vanga leh Vahrit thi tawh thlalak darh chu Hranghlui Facebook group ah Lalhruaia Sailo tihin a post a ti a, he thlalak darha watermark ah hian Chhakchhuanga Enga tih a chuang a, hei vang hian Mizoram chhung ngei anih rin ani tih sawiin thlalak leh post darh hi screenshot an hmuh anih avangin thlalak hun leh post hun hriat theih ani hrihlo tih a sawi.
Pi Margaret-i sawi danin Aizawl Police Station ah FIR thehlut turin an kal a ti a, amaherawhchu Cyber Crime lamah an lo forward sak avangin karleh Thawhtanni ah an kal dawn a ti a, Bethseby Lalremruati Range Officer hmingin case ziahluh ani tih a sawi.
Vanga leh Vahrit hi nungcha humhalh bik scheduled 1 ve ve an ni a, Tarlan tawh angin Conservation Mizoram in ramchhunga sava zirchianna a kalpui mekah kumin April ni 7 khan Vangá Blyth’s Tragopan Tragopan blythii chu Thaltlang khaw ram chhung, Phawngpui National Park nena in rina ah thla lak fuh a ni a; hei hi Mizoramah Vangá ala awm ngei a ni tih kum 10 hnu a chian leh theihna awmchhun a ni.
Vangá te hi International Union for Conservation of Nature (IUCN) leh BirdLife International te chuan mang mai hlauhawm hnai tawh ‘Vulnerable’ category ah an dah a ni. An chenna ram chereu zel vang te, an sa ei atana pèl ṭhin an nih vang te hian an tlem tial tial niin hriat a ni bawk.
Hemi chungchangah hian ASEP chuan Forest department lam hmalakna an ring tawka, theih tawpa tawiawm pawh an tum tih an sawi ve bawk.
