May ni 13, 2024 hnu lam atangin hnam dang dan lova sumdawn nana Bawngsa zuarte chu inthiarfihlim turin Mizo Bawngsa Zuar Association chuan an hriattir a. Zuar lui an awma, an chungah thleng palh a awm a nih pawhin an mawh phurhna a nih loh thu an sawi nghal.
Mizo Bawngsa Zuar Association chuan vawiin khan Aizawl Press Club-ah chanchinthar lakhawmtute klawmin an president H.Lalhmingthanga chuan, “Tunhnai deuh atang khan hnam dang Bawngsa zuar an awm ta pheuh pheuh a. Veng thenkhatah phei chuan kan ni serh Pathianni te pawh min zah sak lovin, Bawngsa zuar hmuh tur an awm ta fo a. Heng dan phal loha Bawngsa zuarte hi kan ngaimawh ta tak zet a ni,” a ti.
H.Lalhmingthanga chuan, “Heng hnam dang Bawngsa zuarte hian phalna an neih hriat a ni lova, an ILP han chhui chian chuan pek an nihna anga hmang an awm lo, cement mistiri, helper leh construction work danga thawk tura rawn lutte an ni a. Phalna nei lova hetianga sumdawnna an rawn kalpui ve ngawt hi a ram leilung fate chanfo in chhuhpuina a ni.
“Tun hi hmalak hun a ni a, lungrual hun tak a ni, engmah kan kan tih loha kan enliam mai mai chuan zawi zawiin min chimral ang a, an mahni pui turin an mahni mi lehsa bawk an ruai leh a, kan ram chhungah hnam dang nasa takin an pun phah a, muangchanga hmalain kan ram sum leh pai tam tak hnam dang kutah a luang zel a ni,” a ti bawk.
“Bawng talha eizawng Mizo zingah pawh hnam dang thurualpuia lo hum tlatte, mahni hming hawh tira sumdawnna kalpui engemaw zat an awm a, Dan kalh a, hma lo la duh, ram leilung fate hamthatna leh chanvo tur an chhuhsak theihna tura ke lo pen duh kan Mizo puite ngeiah an han awm ta mai hi a lungchhiat thlak kan ti hle a ni,” Mizo Bawngsa Zuar Association President chuan a ti bawk.
