Kolasib April 12th : Vawiin khan Pu John LT Sanga, Deputy Commissioner, Kolasib chuan Vairengte khaw chhehvel a hmalakna hrang hrang a endik a, Aitlang leh Sabual muala Mizoram Police duty-na hmunte tlawhin a țul a hman tur pawisa fai leh silpaulin engemaw zat a hlan. Kolasib DC hi Pu Vanlalchhuanawma Chawngthu, SDO (S), Kolasib, Pu Isaac C.Lalrempuia, SDO (C), Vairengte, Pu Hmingthanzuala, DIPRO leh MJA member, Kolasibten an țawiawm a ni.
SDO (C) Conference Hall, Vairengteah Pu John LT Sanga, Deputy Commissioner chuan Vairengte khawtlang hruaitute nen inkawmhona hun a hmang a. District bawrhsap mawhphurna țha tak a hlenchhuah a nih theih nan thawhhona țha a pawimawh thu sawiin chumi tur chuan inhmelhriatna leh inpawhna țha neih a țul thu a sawi a. Hrileng kar a ram pumin buaina a hmachhawn lai a kan ram luhkapui ber awmna Vairengte khaw mipuiten kawng hrang hranga an mawhphurnate an hlenchhuak țhin chu fakawm a tih thu Pu John LT Sanga chuan sawiin ramria buaina chungchangah pawh midangte entawntlak khawp a ram leh hnam tan a huaisenna leh tlawmngaihna an lantir țhin chu ropui a tih thu a sawi bawk a ni.
He hun hi Pu Vanlalchhuanawma Chawngthu, SDO (C) in kaihruaiin khawtlang hruaitute nen khawtlang a harsatna awmte leh a sutkian dan tur sawihona hun neih a ni.
Pu John LT Sanga chuan ramri veng a duty Mizoram Police-te a tlawhnaah hian an inpekna leh an huaisenna fakawm a tih thu sawiin ram tan a fehchhuak an nih anga an hna rinawm tak a hlenchhuak zel turin a fuih a. An harsatnate sawipuiin a țul angte bawhzui sak a nih tur thu a sawi bawk a ni.
