MNF Legislature Party chuan an Leader Lalchhandama Ralte hovin vawiin hian Aizawl Press Club-ah chanchinthar lakhawmtute kawmin, “Ni 3.5.2024 a CM zahawm tak Pu Lalduhoma’n Press Conference a neih tum khan mipui hriatah Thu dik lo chiang tak a sawi avangin kei ni MNF Legislature Party leh MNF Party chuan thudik puan chhuah ngei țul kan ti a ni.
“CM zahawm tak Pu Lalduhoma’n MNF sorkar lai, kum 2022-23 a SASCI Part-I sum Rs 20,000 lakh lapse anga a sawi kha thu dik lo a ni a. Hemi kum hian Mizoram tan Rs 40,000 lakh sanctioned a ni a, Rs 40,000 lakh man hna chu tender vek niin Contractors ten hna pawh tha takin an thawk a. Kha Financial Year chhung khan 2nd instalment kha lo chhuak hman lo mah se a taka hnathawh vek a nih avangin Rs 20000 lakh chu a kum lehah a hma kuma UNPAID BILLS pek nan Central sorkar Finance Ministry chuan a rawn released full leh vek a ni.
“Tichuan kum 2022-23 a Rs 40000 lakh chu a kimin Mizoramin kan hmu a, sum lapse pakhatmah a awm loh avangin hnathawh bill zawng zawng pe tur pawhin MNF sorkar khan harsatna a nei lo. Projects zawng zawng tha taka thawh vek a ni,” a ti.
Lalchhandama Ralte chuan, “Kum 2023-24 ah Central sorkar Finance Ministry chuan Mizoram tan SASCI Part-1 hnuaiah Rs 50,000 lakh allocation a pe leh a. A chunga sawi ang khian a hma kuma Unpaid bills pek tlak nan Rs 20000 lakh additional a sanction tel bawk. (He Rs 20000 lakh hi kha tih laia CM zahawm takin a bika a dil leh Union Finance Minister hmaichhana a sawpui anga rawn pek belh a ni a, sum a lapse ta lo a ni.)
“MNF sorkar lai ni 6.9.2023 ah kum 2023-24 atan SASCI Part I sum hi Rs 46,255 lakh dawngin, ni 2.2.2024 ah Rs 414 lakh Mizoram Finance Deptt in a dawng a, chuta tang chuan Rs 20,000 lakh chu MNF sorkar in a hnathawktu Implementing Deptt ah a released nghal a. A bang Rs 26,669 lakh chu Model Code of Conduct a lo awm zui tak avangin Finance Deptt in a kawl zui ta a ni.
“Tichuan December thla tirah ZPM Sorkar thar a lo piang a, sorkar hmasain dan ang thlapa PWD registered Contractor a lo ruatte chu hnathawk hlei thei lovin an siam a, SASCI Guidelines leh sanction Terms & Conditions ah State Finance Deptt in ni 10 chhunga sum hi Implementing Deptt kuta pek chhuah tur a tih laiin, ZPM sorkar chuan 1st instalment sum Rs 26,669 lakh hi kum 2023-24 Financial Year a liam ni, ni 31.3.2024 ah pawh release lovin a la kawl tang lui tlat a ni. He tia 1st Instalment ber pawh ZPM sorkarin an release duh loh avang hian 2nd instalment tura sanctioned thlap tawh Rs 23,331 lakh chu a lapse ta vek a ni.
“ZPM a lo sorkar hnuah Contractors te hna chhuh thensak tuma an innawr chhung a rei a, hei hi thu dik a ni tih finfiah nan SASCI Contractors ten PWD a Joint Represention an submit a. Hetih lai hian Assembly session-ah chuan zahpah nei miah lovin Contractors work order nei tawh te an tibuai lo tiin thu dik lo an sawi hmiah hmiah a ni. PWD Officers te an tikhawngaihthlak hle. Mizoramah sorkar a inthlak fova, contractor te sorkar hmasa hna peksa inchhuhsak hi a awm ngai lo ni a hriat a ni a, Kalphung Thar hi a mak bik hle a ni.
“He sum fai Rs 23,331 lakh lapse hi a tam tham em em a, veng leh khaw tam takin an tuar dawn a, he sum atanga hmasawına ruhrel rotling tam tak siama chumi paha GST leh Labour cess atanga cheng nuai sang bi sorkarin a chang tur chu khatih laia MNF Sorkar leh Central sorkar duh dan leh sanction dan a nih laia, sorkar tharin a ti lapse vek mai hi keini MNF Legislature party chuan pawi kan ti a. A mawhphurtu Chief Minister & Finance Minister Pu Lalduhoma hian mipuiah ngaihdam a dil ngei ngei turah kan ngai a ni.
“Kan hriat danin Mizoram PWD te hian SASCI 2023-24 Part-1 a sanction approval an neih zat Mizoram Finance Department atangin Administrative Approval (AA) an nei a. Chumi mil chuan tender chhuahin contractors te an thlang a ni. Central sorkar Finance Ministry sanction approval mai bakah Mizoram Finance Department Administrative Approval awm thlap tawh si, projects sum lapse hi thil pawi lian tak a ni.
“SASCI sum pe chhuak mai lo va ZPM sorkarin a suasam chiam hi a serious hle a, MNF Legislature party chuan Zoram mipui thlavang hauh nan Governor pawh sawipui kan tum a, a țul dan a zirin Central Ministry ah pawh bawhzui zel a ni ang,” a ti bawk.
