:Vawiin, ni 7.5.2024, Thawhlehni chhuna In pathum rawktu Lalmuanpuia (22) s/o K. Lallura(L), Chhingchhip Venghlun chu Chhiahtlang N&S VC te leh mi tlawmngai te ṭangrualin an man.
May ni 7,2024, Thawhlehni zing Dar 9 vel khan Pu K. Lalrochhara, Kawnveng (Health&Wellness Centre thlang) te In rawk a nih thu Chhiahtlang South VC ten an dawng a, South VC te hi mi tlawmngai ṭhenkhat ten puibawmin misual zawn hna chu ngawrh taka beih nghal a ni a. Khaw chhung leh khaw dai vel te ngawrh taka zawn a nih laiin, Pu Lalpianfela, Hmarveng te In rawk a nih thu report a awm leh a. Khawtlang hruaitu te lû a hai viau laiin, Veng chung lamah Pu Rohminga In rawk a nih thu dawn a ni leh ta a.
Pu K. Chhandamthanga (Police), Chhiahtlang North&South VC te bakah mi tlawmngai ten chhui zui zelin, he misual, In pathum ngawt mai rawktu hi a In rawk hnuhnung ber Pu Rohminga te kawmthlang, Kawnveng – Hmarveng PWD Road-ah an man ta a ni.
A kut aṭang hian pawisa eng emaw zat leh Mobile Phone bakah, Ganja ṭhahnem tham tak man a ni. A pawisa ruk hmang hian bag, kekawrbul leh Mawza te a lo lei hman niin a insawi.
Serchhip Police kutah hlan niin, Serchhip Police ten an la nghal a ni.
