Mizoram-a damdawi zuar intelkhawm pawl, Mizoram Chemists & Druggist Association (MCDA) te chuan vawiin khan General Assembly vawi 37-na Dawrpui Multipurpose Centre ah an hmang.
Hun hmannaah hian Khuallian Lalsawma, Joint Director (F&D), Health & Family Welfare Dept. chuan MCDA te chu sumdawng dang te ang lo takin mipui rawngbawltu, chhungkaw tin mamawh an nih thu a sawi a, khawvel-a Surgeon tha ber pawh awm mahse, damdawi mamawhte ban phaka a awm si loh chuan awmzia a awm loh thu sawiin, damdawi zuarte chu an hlutzia hrethar turin a chah a. Dan phal loha damdawi ruihhlo zuar ru te chu na takin Sorkarin a hrem zel thu leh an Drug License pawh cancel tawhte an neih nual tawh thu sawiin, Drug License chungchangah Sorkar thar chu khauh leh zual a tum chu lawmawm a tih thu a sawi.
MCDA President Pu Lalhruailiana Sailo chuan Pharmacist te rawih man an inchhiar to ta lutuk chu an pawl tan phurrit a nih thu a sawi a, Pharmacist indaih loh avanga kawng dang Sorkar-in dap se an tih la hlawhtling thei lo chu pawi a tih thu a sawi a, damdawi zuarte chu damdawi-a hlep tam ringawt um lo in dawmdawi tha leh rintlak a ni em? tih zir chiang thin se a ti bawk.
MCDA te hi kum 1977 khan din tan a ni a, thu dawn danin tun dinhmunah damdawi zuarte intelkhawm zelin, in-affiliate Damdawi License nei mi 4000 chuang an awm mek a ni.
General Assembly ah hian Secretary Report leh Financial Report te ngaihthlak a nih bakah kum 2024-2026 chhung atan pawl hruaitu thlanna neih nghal a ni.
