Nizan khan President Draupadi Murmu-i chuan ramchhunga civil mite chawimawina sang Padma Shree award chu TNT dintu leh enkawltu Dr. Sangthankima hnenah a hlan.
Delhi-a Rashtrapati Bhavan-a inkhawm buatsaihah chawimawina hi hlan a ni a. Civil mite chawimawina sang ber Padma Vibhushan chu artist hriathlawh tak Dr. Vyjayantimala Bali leh Telegu film changthiam Konidela Chiranjeevi te hnenah hlan a ni a. Supreme Court-a hmeichhe judge hmasa ber Pi Fathima Beevi hnenah Padma Bhushan a thih hnuah hlan a ni bawk a. Ani bakah hian lunglam doctor hriathlawh Dr. Ashwin Balachand Mehta leh Politician senior O.Rajagopal te pawh chawimawina hlan zingah an tel.
Padma Award hi chhawng thumah then a ni a. Chawimawina sang ber hi Padma Vibhushan a ni a, Padma Bhushan leh Padma Shri ten an dawt a ni. Heng award te hi ramchhunga civil mi kawng hrang hranga mi hmingtha leh chawimawi tlakte hnenah hlan thin a nia. Kumtinin Republic Day-ah Padma Award dawng turte hi puanzar thin a ni a.
Thla hmasa April ni 22 khan President hian Padma Vibhushan pathum, Padma Bhushan pariat leh Padma Shri 55 a lo sem tawh a ni.
