Vawiin May 10, 2024 Zirtawpni hian Congress Party chuan Friday Political Session Congress Bhavan ah an hmang a, he hunah hian Mizoram Pradesh Congress Treasurer, Dr. Lalmalsawma Nghaka chuan thu sawiin, “Vawiinah chuan, ‘Central-ah BJP an sorkar ang’ ti ngam an awm ta meuh lo. Tunkar chhung hian stock marker a su kual nasa em em a, expert-ten a chhan hrang hrang an sawi zingah ‘hung parliament’ an bei sei thu te pawh an sawi a ni” a ti.
“Modi-a hi a mangang em em a, seat 400 chuang kan la ang tia tlangau thin kha, tunah chuan Rahul Gandhi a bei ta ngar ngar ringawt mai a, Amit Shah pawhin nasa takin Muslim mite a bei ngat ngat ta zawk a ni. Hmana Rahul Gandhi-a nuihzat a, deusawhtute khan an fak leh tawh a, hnam hnuaihnung leh kut hnathawktuten an tana ding Rahul Gandhi an ngaina em em leh ta a ni.
“Mizoram Congress te pawh kan tho kang mek a. Keini hi chuan nghet taka din kan mamawh. Kalphung thar kan mamawh ve tawh lo a, keini chu kalphung dika kan kal a ngai a ni. Kalphung tharah chuan mite fak beiseiin hna an thawk a, danglam bik angin an inzuar kual a, midang fak nan chauh hna an thawk thin. Keini chuan mipuite tih lawm tum rikngawt kalphung kan duh ve lo. Kan mipuite’n leirem an rah theih nan keini hi mi ngelnghet leh mi rintlak kan nih phawt a ngai a ni. Tun dinhmunah hian eng kawng nge zawh ila kan hnam hi a ngelngheh ang tiin ngaihtuah ila, kan mamawh dik tak zawng chhuakin, taima taka hna thawh kan tum a ni.
“Congress sorkar-in rangva a sem lai khan Zoram mipui chhungkaw tinte kan rethei em em a, a hun lai khan rangva in neih kha kan mamawh ber a ni. Chutiangin, NLUP pawh kha mipuiin an mamawh ber a nih avanga sem kan ni a. Tunah hian kan Zoram mipuite mamawh ngun takin kan ngaihtuah a, hun inher danglam mil zela kan insiamrem a ngai a ni. Tunlaiin company hlun leh hmasawnte chuan hun inher danglam a zirin mipui mamawh siam chhuakin ngaihtuahna an seng a. Chutiang zelin ZORAM pawh hian policy thar, rintlak leh mipui nawlpui ban phak kan mamawh hle a, Congress party chuan ngaihtuahna thar kan seng mek a ni.
“Zoram puma Congress hruaitu, mipuite tana hna thawk thinte khan Pathian hre rengin mipuite tana ding thar leh turin ka ngen che u a, mipui mamawh phuhruktu ni thar leh turin theih tawp i chhuah ang u.” a ti.
He inkhawmah hian Pu Vanlalruata Secretary chuan report peiin Mizoram Pradesh Congress chuan hma lak dan tur road map siam a tum thu a sawi a, mi thiamte leh party tana mi ṭhahnem ngai ten he road map-ah hian ngaihdan a thawh theih thu a sawi a, Congress dan bu siam danglam a nih thu sawiin Unit President atanga MPCC president thlengin term hnih bak chelh loh nise tiin executive committee-in a rel tih thu a report.
