May ni 4, 2024 atanga chin hriat loha bo Tv. Lalrinhlua (K-28) S/o R Lalzawna, Thenzawl Hermon Veng chu vawiin khan a ni tawp kharna tur niah dam taka hmuh a ni.
May 4, 2024-a an chenna in aṭang a chhuak chin hriat lohin a bo zui ta Lalrinhlua hi a tuk May 5 aṭangin Thenzawl Joint VC leh Joint YMA huaihawtin zawn zui nghal a ni a. Thenzawl khaw ṭhenawmte – Neihloh, Buangpui, Kanghmun, Zote South, Sailam, Sialsuk, Keiṭum, Lunglei Lunglawn, Lunglei Hrangchalkawn, Hmuifangtlang Group YMA, Serchhip Sub-Hqrs YMA ten mibo zawnga an puihna avangin Thenzawl khawtlang hruaituten lawmthu an sawi.
Mibo hmuhna hmun hi Minister leh khawtlang hruaitu ten pan nghalin, Thenzawl CHC ah a hriselna dinhmun te endik zui nghal a ni a, a nunna atana hlauhawm engmah a awm lova hriat a ni.
Vawiin khan Chief Minister leh Bialtu MLA Lalduhoma tirhin B. Lalchhanzova, Supply Minister chu Thenzawla mibo zawng hnatlangin a thawkchhuak a, hnatlang ṭanpuinan Rs. 5,000 a pe a, mibo chhungkua te hnenah thlahual nan Rs. 5,000 a pe bawk. Minister hi KJ Lalbiakngheta, Secretary, ZPM Gen Hqrs-in a ṭawiawm a ni.
Vawiin hi Mizo dana ni sarihna leh mibo zawn tawp ni a ni a. Chawhnu dar 1:30 vel khan Chhiarchhuak lui hnar, Tlawng lui leh Lau Lui infinna bul hnai, Thenzawl ramah mibo hi dam taka hmuh a ni.
B. Lalchhanzova chuan, “Chief Minister aiawhin kan lo kal a, hetianga Mizo tlawmngaihna chawinungtu leh ṭanpui ngaite ṭanpuitu zawng zawng chungah CM aiawhin lawmthu ka sawi a, kan mibo pawh nunna atana hlauhawm engmah awm lovin, dam taka kan hmu leh hi a lawmawm hle mai a, Pathian hnenah lawmthu i sawi ang u,” a ti.
