Miss Mizoram Lunglei 2024, Jennifer Zothanzuali chuan vawiin khan Bethel Center, Sazaikawn leh Baptist Church Orphan Home Ramzotlangah tanpuina Pawisa fai a hlan a, MJA Lunglei member ten an tawiawm.
Thla hmasa April ni 4 atanga ni 16 chhung Zonet Cable T.V leh Mizoram Journalist Association buatsaih Miss Mizoram 2024 thlanna neihzawh taka Lunglei District aiawhtu leh Miss Mizoram Contest a Miss Congeniality atana thlan Jennifer-i hian Miss Mizoram Contest an neih chhunga Social Media kaltlanga mithahnemngai leh amah duhsaktuten atana sum an thawhkhawm, ama tana hmang lova, midangte tanpui nan hman a duh angin vawiin khan Bethel Center leh Baptist Orphan Home ah te hian Rs 10,000/- ve ve hlanin naupangte eitur Sweet Pocket engemawzat a pe tel bawk.
Heng thilpek a hlanna ah hian Jennifer-i hi a chhungte bakah MJA Lunglei member thenkhat ten an tawiawm a, Bethel Center a thilpek hlanna puala inkhawm hi F.Lalngaihzuala Executive Member MJA Lunglei chuan kaihruaiin, BCO hmuna thilpek hlanna inkhawm hi P.C Lalduhthlanga, Vice President MJA Lungleiin a kaihruai thunga, hun kaihruaitute hian Miss Mizoram thlanna neihzawh taka MJA te inhnamhnawih dan leh Dist. tinah buaipuitu an nih dan te sawiin, Lunglei Dist aiawh Jenniferi’n thilpek a pek theihna tura kawng hrang hranga thil lo pianchhuah dan te an sawi a ni.
Thilpek petu Jennifer-i chuan Miss Mizoram Contest 2024 a Lunglei Dist aiawh tura sawmtu leh a tawp thlenga theihtawp chhuahpuitu MJA Lunglei chungah lawmthu sawiin, amah duhsaktu ten sum an thawhkhawm chu amah kaltlanga tanpui ngaite tanpuina tura Pathian remruat nia a hriat thu sawiin, naupang fahhrah khawngaihthlak tak takte enkawlna Home pahnih chu a rilruah a lan avanga tanpuina pe a nih thu sawiin, amah chu a petu niin lang mahse a petu tak tak zawkte chu amah puala sum thawhtu zawng zawngte an ni tiin, heng Home pahnih bakah hian mimal anga a ngaihpawimawh a phak tawka a lo tanpui ve tawh thin chhungkaw thenkhat hnenah tanpuina pek a la tum tih a sawi.
Vawiina tanpuina dawngtu Home pahnih a thawktute chuan sawrkar atangin tanpuina dawng thin mahse a hun tak leh mamawh hun taka an hmuh thin loh avangin mi inphalte zarah mualpho lovin an awm thin tih an sawi a, an innghahna ber chu Pathian a nih avangin Pathianin a hun takah tanpuitu a pe thin an ti a, Miss Mizoram Lunglei Jennifer-i an mahni tanpui duhna a nei chu amah a Pathian hnathawh langchhuak ngei nia an hriat thu leh tangkai taka an hman tur thu sawiin, a kalzelna turah duhsakna an hlan a ni.
Bethel Center a hun an hmannaah hian Home Superintendent K.Laltawnga chuan lawmthu sawina hun leh an Home chanchin tlangpui tarlangin tun dinhmunah naupang kum 3 atanga kum 17 mi 70 chuang hlek an awm a ti a, Sawrkarlaipui atanga tanpuina mipakhat tan Rs 3000/- an hmuh thin thu leh hei hi an zirna, ei leh in leh an mamawh engkim atana hman tur niin, naupang 50 chin chauh tanpuina dawn theih a nih laiin naupang 70 chuang an kawl thin tih a sawi a, kumin bikah tanpuina hi an la dawng lo a ti.
BCO Home Superintendent Rev. Vanlalruata pawhin BCO ah nau pianghlim atanga kum 13 mi 30 an enkawl mek thu sawiin heng zinga naupang 9 chuan Adoption Agency an nih anga Adoption Ward a mite an ni a ti a, BCO chu kum 2013 atangin Sawrkara in registered a nih ang leh kum 2016 atanga Sawrkarin Adoption Agency atana a thlan avangin sawrkarlaipui atanga tanpuina an hmuh thin thu leh a hun tak zelah erawh an hmuh ngailoh thu a sawi a, mi inphalte atanga a khat tawka tanpuina an dawn thin bakah Sawrkar atanga an dawn thin bawk avangin Kohhran sum hman hek loh hram an tum thin tih a sawi bawk a ni.
