Siaha, April 12 : Vawiin khan Siaha District Headquarters ZPM Office-ah MADC Inthlan lo awm tura ZPM Manifesto tlangzarhna leh mi thar lawmluhna hun hman a ni a. He hun hi Pu SL Ngursailova Sailo, GS i/c Vigilance-in a kaihruai a; Pu K. Sapdanga, Working President, General Headquarters chuan MADC Election Manifesto tlangzarhna leh mi thar lawmluhna hun a hmang a; Pu BS Lualai, GS, ADC Congress leh Pu David NT Beizi, GS, ADC BJP te ZPM-ah lawmluh an ni.
Manifesto tlangzarhtu Pu Sapa chuan thu sawiin, “Kan beisei phak bakin Siaha District-ah ZPM-in hma kan sawn a. Tunhnaiah Chhimlama ZPM hmasawnna kan hmuhin MADC inthlanah pawh hian, Pathian leh MADC area mipuite zarah ZPM chuan chakna kan chan ngei kan beisei hle a, chakna kan chan ngei theih nan kan theihtawp tak meuh meuh kan chhuah a ni,” a ti. “Vawina tlangzarh tak MADC election manifesto-ah hian ZPM innghahna ‘Kalphung Thar’ kan hmu nghal a, sawrkarna kan chang a nih chuan heng kan manifesto-te hi kan tihlawhtling ngei ngei dawn a ni,” a ti bawk.
Vawina ZPM party tlangzarh tak manifesto-ah hian:- MDC-LADS Fund hman dan ruahmantu Local Development Committee din leh Fund zawng zawng (100%) mipuite tana hman vek te, MDC zawng zawngte thla tin vawi 1 aia tlem lo bial fan chhuah te, Council Library hi Zirlaite tan Competitive Exam inbuatsaihna tlaka tihchangtlun te, MADC hnuaiah thalaite hmasawn nan Youth Commission din te, Education system siamtha tura hmalak te, Truck terminal tha tak siam te, MADC hnuaia sorkar Office Furniture te ram leilung fate siam chauh hman te, Agricultural products tihpun a nih theih nana hmalak te, Palâ Dil leh Beino lui khualzinte hip tur leh tlawh chakawm taka siam te, MADC inrelbawlna fel zawk a awm theih nan Administrative Reform Commission din te, MADC hnuaia Department te a nih dan tur ang taka kalpui te leh, The Schedule Tribes Order 1950 (Mizoram ST List No.8)-a Mara hnam ‘Lakher’ ti-a la inziak hi ‘Mara’ ti-a thlak tura hmalak te a tel a ni.
Dated Aizawl, the 12th April, 2022
