Vawiin May ni 22.5.2024 (Nilaini) khan Pu Laltawnliana President MPYCC leh MPYCC hruaitute chuan kum tlinglo ram pawna hnathawk tura thawn chhuah chungchanga harsatna ching fela hmala turin Home Minister Pu K. Sapdanga chu a office-ah an hmu.
Hmala tura an ngenna lehkha Home Minister hnenah an pekah chuan, “India danin naupang kum tling lo hnathawka chhawr a phal loh lai leh passport dik lo (a lem) hmanga hnathawk tur inthawnchhuah chungchanga hma la tur leh thil dik lo titute an phu anga hremna pe a, a tul anga hma la turin MPYCC chuan ni 28.4.2024 khan Chief Minister Pu Lalduhoma chu a office-ah hmuin ngenna kan thlen a. Pu Lalduhoma hian he thilah hian sorkarin a tul anga hma a lak tur thu leh Agency te pawh titawp nghal tura a tih thu MPYCC-te min lo hrilh nghe nghe a.
“Thla khat dawn a liam tawh hnuah pawh hmalakna mumal a awm loh bakah, thil dik lo titute hremna mumal tak a awm lo nia hriat a ni. Hei hian Chief Minister-in dan leh thupek a ngaih pawimawh lohzia te, a enkawl mipuite himna a ngaih pawimawh lohzia leh thil tak tak ti tlâk a nih lohzia a tichiang hlein MPYCC chuan kan hria a. Home Minister I nih ang leh Chief Minister aia harsatna chingfel thuai thei zawk tura MPYCC chuan kan ngaih avang chein he thilah hian hma la turin kan ngen che a, Chief Minister hian a nihna hial pawh hi a tul a nih chuan kian ngam tur chein kan phut bawk a ni.
“Tun hnaiah Talmud Employment Agency te chuan kum tling lo ram pawnah hnathawk tura an thawn avangin an chenna Bazaar Veng, Mamit YMA leh naupang nu leh pa te an mangang hle a. Ni 10.5.2024 khan CID Crime Branch-ah FIR pawh thehluh a ni tawh bawk. Harsatna tawk kum tling lo hi Visa Status Local Authority te’n endikin, Visit Visa thlakhat dam tura UAE lut a nih bakah Resident Visa (Sponsor Visa) kum hnih dam an lo chhu (stamp) hman bawk.
“He thilah hian Chief Minister rintlaka kan ngaih loh avangin Home Minister I nih anga a rang lama chinfel a nih theihna tura hmala tur leh thil dik lo titu Agency-te hi man a, hrem turin kan ngen che a. Harsatna tawk naupangte hnen atanga pawisa fai Rs.30,000/- an laksak pawh a rang lama pelêt nghal tura hma la turin MPYCC chuan kan phut bawk che a ni.
“Mizoram Police thuchhuah May ni 1, 2024-in a tarlan danin, Syria rama Mizo hmeichhe naupang pathum (3) hnathawk tura thawn harsatna tawkte hruai haw an nih tur thu leh Syria-a Indian Embassy pawh dawr nghal a nih thu tarlan a ni a. Mizoram mipui leh harsatna tawk chhungkua te pawh an lawm hle. Mahse, Syria Indian Embassy lamin Mizoram sorkar emaw Central Ministry of External Affairs (MOE) atangin official-a biak an la nih loh bakah harsatna tawk naupang pathumte, vawiin ni thlenga biak an la nih loh thu leh Mizoram atangin Agency-te leh CID nia inchhal te’n mumal lo taka an biak bak engmah hmalakna a awm zui lo hi MPYCC chuan mak kan ti takzet a, he thilah pawh hian a rang lama mi mangangte harsatna chingfel turin kan ngen che a. Tun achinah chuan sorkar hian thudik tawk lo Mizoram mipui hrilh tawh lo turin kan phut a. He thilah hian a rang lama hma la tur leh thudik tak leh belhchian tlak chauh mipui hnena sawi turin sorkar kan phut bawk a ni.
“MPYCC chuan Mizoram sorkar-in Syria Indian Embassy hi eng kal tlangin nge a biak? tih hi mipui min hrilh tur leh sorkar hian tlâwmah la lo a, Ministry of External Affairs, New Delhi-a Mizo IFS Senior pahnih awm te kaltlang tal hian Syria Indian Embassy emaw Dubai-a Mizo tlangval tlawmngai Lalchhuanzela (Zela) hmang hian a rang lama hma la thuai turin kan ngen a. He thil dik lo tak, mihring hmanga sumdawnna, India dan leh Pathian thu pawhin rem a tih loh, a phal loh titute dodal tur hian Kohhran, Sorkar, Political Party, NGO te tangruala hma la tur leh penchhuak turin kan ngenin kan sawm bawk a ni,” tiin an tarlang a ni.
