Vawiin May ni 24, 2024 (Zirtawpni) hian Congress Party chuan Congress Bhavan Golden Hall-ah Political Session hun hmangin PC Laltlansanga, Genereal Secretary, MPCC leh John Siamkunga, Ex- MLA, General Secretary, MPCC chuan thu an sawi.
MPCC General Secretary, PC Laltlansanga chuan Education reforms chungchang sawiin, tunhnaiah Matric leh pawl 12 result a chhuak a, Mizoram pumpuiah kan result a tha thawkhat. Hetihlai hian kan Education hian thiamna tak tak min pe em tih kan ngaihtuah a ngai a. M.A, M.Sc kan tihte leh mithiam tam tak nia kan ngaihte hian an degree phu tawk hna thawh tur an hmu lo. Mizo thalaite an huaisen em em a, passport mumal lo chung pawhin Islam kulmuk takte ramah hnathawk turin an kal ngam. Mizorama political party tinte hian kan thalaiten hnathawh tur an hmuh theihna tura policy kan duan a hun tawh a. Education pawh siam tha a, chhawr tlak leh hnathawk tak tak thei tur thiamna pe tura Eduication hi kan siam that a ngai a ni, a ti.
PC Laltlansanga chuan, ‘Mizo thalai eizawnna mumal neilo harsatna tawk thahnem tak kan awm mek a. Chung mite hip nan chuan ZPM hotute khan, ZPM a sorkar chuan Zoram Development Bank a din ang a, Loan a pung awmlo vin thalaite bul tanna tur an pe ang a. Sorkar hi guarantor ah atang ang, tiin an inzuar a nih kha. Khang an intiamna avang khan ZPM sorkar hi thalaiten beiseina sang tak nen kan thlir a. An intiam angin engtikah nge Zoram Development Bank an din ang a, a pung awmlo a loan an pek hun tur Mizo thalaiten kan zawt a ni. ZPM sorkarah chuan a rate hre sain kut hnathawktuten thlai an ching tawh ang’ an ti thin a. Nakum kum 2025 ah hian sawhthing leh Hmunphiah kg khat cheng engzatin nge kut hnathawkten an hralh dawn, tih hi sorkar kan zawt a ni. An intiam angin kut hnathawktute hi nakuma sawhthing leh hmuhphiah rate tur min hrilh rawh se’ a ti.
John Siamkunga, EX- MLA pawhin thusawiin khawvel democracy ram lian berah BJP ten rorelna an chang mek a, Journalist te an thunun mek a. Advertisement ah sum tam tak an hmang a. BJP te rorel dan hi ngun taka kan zir chian a ngai tawh a. Mizo mipuiten kan duh loh em em CAA min passed luih pui a, he CAA avangin hian Mizo mipui nuai 12 vel lek te hi kan him lo hle a ni. Tunah pawh Uniform Civil Code kan hmang dawn tiin BJP hruaitute chuan langsar takin thu an sawi a. BJP ten rorelna an chang chhunzawm a nih ngat chuan India rama hnam tlem zawk leh sakhaw tlem zawkte dinhmun hi a derthawng hle a ni, a ti.
John Siamkunga chuan, KMMTTP kan tihte pawh India tana thil tangkai tak, sumdawnna luhka ber tur ni mahse, a hmang tangkai tak taktu zingah Mizote hi kan tel phak kher angem, an vaivut khu chauh hi kan chan tawk a ni mai angem, tih hi ngun taka kan ngaihtuah angai a. Ram dang atanga ram danga hnathawk tura chhuakte zingah mipa an tam zawk laiin Mizoram atang chuan hmeichhia an tam filawr zawk tlat mai te hi a hnam anga kan inenfiah angai a. Politics hi a danglam tawh a. Mipuiten thil tha an duh tak tak tawh. Mipuite hi kan bum a thiang lova, mipui tana hnathawktu kan nih angin mipui tan eng policy hi nge tha anga, eng hian nge mipuite retheihna ata chawi chhuak ang, tia ngaihtuahna kan sen a ngai hle a ni, a ti.
