Mizoram Police te chuan tunhnaia Railway hotute Chief Minister Lalduhoma hnena an zualko na chungchangah thuchhuah siamin, “Mizoram chhungah North East Frontier Railway ten Bairabi atanga Sairang Sihhmui inkar relkawng siam hna an thawh mekah rel kawng siam mek hian Kolasib District leh Aizawl District-te a kaltlang a. Heng district pahnih chhungah hian Police Station pathum area – Bairabi Police Station (Kolasib District), Kawnpui Police Station (Kolasib District) leh Sairang Police Station (Aizawl District) te a paltlang a ni.
“Home Department atanga hriattirna kan dawn angin relkawng siam hna thawh meka harsatna leh thubuai lut awmah te hian Mizoram Police chuan theihtawpin hma a la thin a, Sairang Police Station, Kawnpui Police Station leh Bairabi Police Station-ah te hian rel kawng siam kaihhnawihah thubuai 28 (sawmhnih pariat) ziahluh tawh niin thubuai hmasa ber hi Dt. 22.03.2018 ah Kawnpui PS ah ziahluh a ni a, thubuai thar ber hi Bairabi PS ah Dt. 09.03.2024 khan ziahluh a ni bawk. Heng zinga thubuai 26 (sawmhnih paruk) chu rukruk kaihhnawih a ni a, thubuai dang 2 (pahnih) hi invau leh insuam case a ni.
“Bungraw bo te hi rel kawng siam hnathawktute camp bul hnai leh hmanraw dah khawmna hmun atanga bo ani tlangpui a, rel kawng atanga bo a awm lo a tih theih a, chuvangin hnathawktute hriat lohva ruk bo chu a harsa tlangpui ang. Rel kawng siamna hmanrua bote hi bungraw rit tak tak- steel shuttering, heavy duty MS pipe, drain slab, bridge steel gate, steel plate, copper cable, channel leh hook bolt te telin mi pakhat tana ruk mai theih a nih loh bakah motor-a phurh sawn ngaite an ni.
“Thubuai ziah luh kaihhnawihah hian thil sual titu mi 62 (sawmruk pahnih) man tawh an ni a. Thil sual titu man zingah hian hnam dang 14 (sawm pali) telin thubuai thenkhatah phei chuan a hnathawktute pawh pawikhawihtu an ni tih hriatchhuah a ni. Thubuai ziah luh 28 (sawmhnih pariat) atang hian thubuai 19 (sawmpakua) a bungraw rukbo te hi Police ten an hmu let leh a ni.
“Thilsualtitute chhui chhuak tur leh thil rukbote hmuh let leh tur hian Police ten theihtawp an chhuah thin a. Thil bona hmunte uluk taka endik in rel kawng siam hnathawktute bakah a bul hnaia awmte uluk taka kawm thin an ni a. Thirchhe leikhawmtute dawr zawng chhuakin rukruk thil ni ngeia rinhlelh zuar an awm leh awm lohte uluk taka zawhfiah thin an ni.
“Hemi chungchanga Railways thuneituten CM zahawmtak an hmuh denchhen a Railways bungraw bo leh thubuaiah te Police ten hma an la tawklo anga ngaih theih tura thu thehdarh lo awm hi thu belhchian dawllo niin, rel kawng siam mekah hian pawikhawihna a thlenin Police ten theihtawpin chhuichhuah hna an thawk thin a, thubuai tamzawkah bungraw rukbo te pawh hmuh let leh a ni. Tin, pawikhawihna te a thlen nawn loh nan leh rel kawng siamna bungruate a bo lohna turin Police ten theih ang angin an vilpui a, rel kawng siamna hmunte tlawhin patrolling neih thin a ni bawk.
“Rel kawng siamna hmuna thawktute leh an hotute pawh biak pawh thin niin harsatna an neih chuan Police Station – ah hriattir vat tura hrilh hriat thin an ni,” tiin an tarlang a ni.
