Vawiin May ni 27, 2024 (Thawhtanni) hian MNF party chuan Mizo Hnam run chhung inkhawm an nei a. Hun hnihnaah Prof. F. Lalnunmawia, Ex. MLA, Gen. Secy. MNF Gen. Hqrs. chuan thusawiin, “ZPM sorkar hian an inzawrh ang leh an intiam ang ngeiin thiltha ti rawh se. Mipui hnena an inzawrh ang hian an ti dawn em tih hi kan thlir reng dawn a ni. MNF in sorkarna kan chan takloh nachhanah tumah inmawhpuh tur kan awm lova, ZPM thli a tleh vang mai a ni,” a ti.
Prof. Mawitea chuan, MNF in sorkarna kan chan leh ngei theihna turin rualkhai taka ke kan pen a tul a. Kawng hrang hrangah thawhpui zawn thiam a, theihtawp kan chhuah tlan a tul a. Lungrual takin theihtawp chhuahin bei ila, kan sorkar leh ngei ang, tiin party mipui kalkhawmte a fuih a ni.
H. Vanlalrawna, Gen. Secy. MNF Gen. Hqrs. IT&Media Documentation changtu pawhin thu sawiin, ZPM hian innghahna lungphum leh hruivawn bik an nei miahlo. “Min enchhin rawh u,” tih bak sawitur an neilo. Enchhin hian rei a daih lo ang. MNF innghahna erawhchu nationalism a ni a. Kan sorkar emaw sorkar lo emaw, kan innghahna lungphum hi a nghing ngailo ang. Ka hotuten mual an la liam ang, kan innghahna nationalism erawh a ding reng ang. Social media pian hmaa piang kan nih avangin hemi kawngah hian kan chak tawklo a, kan insiamrem ve zel a tul hle a ni, tiin kalkhawmte a fuih.
