Vawiin May ni 30, 2024, Zirtawpni hian Congress Party chuan Congress Bhavan, Golden Hall-ah Political Session neiin, MPCC Vice President Ronald Sapa Tlau, Ex- MP, Rosiamngheta, AMC Corporator leh Dr. Lallianchhunga, General Secretary, MPCC te chuan thusawiin he session hi Lalringliana Khiangte, Secretary, MPCC chuan a kaihruai a ni.
MPCC Vice President, Ronald Sapa Tlau chuan, hmanni lawk May ni 28, 2024 khan Mizorama BJP hotupa chuan, Pu Vanlalhmuaka chuan Congress Sorkar lai, Indira Gandhi hunlaiin hnam tlem zawk leh sakhaw dangtean chep hle tihn a sawi ta te kha pawi a tih thu sawiin thil zir ching hmasa lo leh hre chiang mang si lova a rawn sawi kha a pawi a tih thu a sawi.
Ronald Sapa Tlau, Ex- MP chuan, Indira Gandhi kha kum 1966 ah Prime Minister ni tanin term hnih a lal a, kum 1964 atanga kum 1996, kum 32 chhung khan Hnam hnuaihnung leh Sakhaw tlem zawkte tihduhdahna hi India ramah vawi 32 chiah a thleng a ni. Congress Sorkar laiin hetiang thil hi a thlen chang awm ve bawk mahse a rang thei ang bera hmehmih tumin hma an la nghal thin a. BJP Sorkar hnuaiah erawh chuan Sakhaw dangte chunga hleihlenna a awm a piangin tihreh tumna a awm ngai lo a. RSS, Bajrang Dal leh VHP te a hmaruaitu an nih avangin a bik takin Kristiante tawrhna hi BJP sorkar hnuaiah a nasa zual a. BJP te hi kum 2014 atanga lal tanin kum 2016 atanga 2019 chhung ringawt khan Sakhaw tlem zawkte chunga hleihlenna hi vawi 1444 lai thlengin 60% laiin a pung a ni. Tunah hian BJP ten MP 400 an neih tlin chuan Indian Constitution atanga Secular tih hi paih an tum thu ualau takin an sawi lang a ni, a ti bawk.
Rosiamngheta, AMC Corporator pawhin thusawiin Mizoram hi North East Corridor kan la nih tur thu sawiin chumi hun atana kan rilru kan lo inbuatsaih lawk angai a. Mipuite hmathatna hi sorkar mawhphurhna a ni a. Ram changkang a piangah Sorkar hnathawk an tlem a, sorkar an suih te a. Hei hi Mizoram pawhin kan tihmakmawh a nih thu sawiin tunah chuan kan Budget chanve aia tam daih Sorkar hnathawk hlawhah a kal ral a. Hemi siam that hi politician-te mawhphurhna a ni. Ram changkangah chuan Health Care te, damdawi in awm man te a free a nih laiin keini chuan damkhaw chhuahna kan la sual ngat ngat a. Mipui lama hmasawnna luang tur zawngin kan kal tur a ni. Politics hian that falna ni lo vin that tlanna a thlen tur a ni a, miretheite dawmkang a, an retheihna ata chhan chhuak turin politics hi i hmang tangkai ang u, a ti.
Dr.Lallianchhunga, Gen.Secy pawhin thu sawiin, ENCHHIN SORKAR kan hrawn mek hi sorkar kal tawh te aiin ram inrelbawlna kawngah quality an nei lo zawk tih a lang chiang mek a, Aizawl khawpuiah ringawt pawh tui an sem rual thei lova, VIP an ni tih mipuiin an hre lovang tih an hlauh vangin an lirtheiah Designation Plate lian pui puiin an tar a. Sorkar Committee pawimawhah neutral zinga mi thiam tak tak te aiin an ZPM mi leh sa te an ruat (appoint) zel a, heivang hian sorkar inrelbawlna quality hi kum 2/3 chhung lekin a hniam phah viau dawn a ni. ENCHHIN SORKAR hian sorkar kal tawhte pawhin an tih duh loh KALPHUNG CHHE ZAWK mipuite min hmuh tir mek a ni. Mizoram Politics KALPHUNG THARAH chuan kum 5 zelah sorkar inthlak kan hmu a. MNF te khan tlin leh an inring em em a, thapui thawhin SASCI sum vaibelchhe tel nen an tang chung pawhin mipuiin kan paihthla dawp mai a ni. ENCHHIN SORKAR pawh hi kan ning leh tan mek. Congress hi hnehin awm rih mah ila, kan tlawm tihna a ni lova, kum 2028 MLA inthlanpuiah chak turin insiam tharna kan kalpui mek a ni” a ti.
