Vawiin khan Dawrpui Multipurpose Centre ah World No Tobacco Day, 2024 hmanna, Indian Society on Tobacco & Health, Mizoram leh National Tobacco Control Programme, NHM te tangkawp in an buatsaih a, Chief Minister Pu Lalduhoma chuan hmanpuiin Pi Lalrinpuii, Health Minister chu khualzahawm a ni.
Thusawiin Chief Minister chuan, hun rei tak zuk leh hmuam dona lama hma lo la thin ISTHM chungah lawmthu a sawi a. Mizote hian kan pi leh pute atang tawhin zuk leh hmuam kan uar tawh a. Vawiin thlengin India ram state zinga puitling zuk leh hmuam ti tam ber kan la ni reng. Cancer vei tamna ber state kan ni a, cancer ni lo natna dang pawh kan tuar nasa hle ang. Kan thihpui ta chiah lo a nih pawhin zuk leh hmuam vanga natna kan tawrh te enkawl nana kan sen ral hi a tam tham ngawtin a rinawm. Ram hmasawnna leh mipuite hriselna hi thil inzawm tlat a ni a, hmasawnna ruhrel tha tak tak sawrkarin a siam chhan pawh mipuite tan a ni. Ran mipui nawlpuite hriselna a that tawk loh miau chuan hmasawnna ruhrel nei tha mahila kan hmasawnna kha a khingbai dawn a ni. Kan huan thlai te chu rah tha tak neihtir tumin, tui leh leitha te, damdawi te kan pe thin. Kan taksa zawk erawh chu thil tha lo, a tichhe thei thil kan barh leh mawlh mawlh thin si. Sum leh paiah kan lo hausa ta chiah lo a nih pawhin miin hriselna hlu tak a neih chuan mi vannei, malsawmna dawng kan ti a. Miin khawvel a pumin nei se, a nun kha chan si se la, atan engmah a sawt si lo tih pawh kan hria a ni. Tin, zuk leh hmuam mamawh turin kan taksa hi siam a ni lem lova, keimahni zawk hian kan lalut chawp a, a ngawl kan vei ta thin a ni. Heng laka fihlim tur hian sum leh pai senso engmah a ngai lova, a thlawna nghei hmak theih thil a ni. Mahse tlin lo kan tam em em si. Vawiin atang hi chuan heng thil tha lo kan chin te hi kalsan tum ila, hnam hrisel leh damrei nih tumin i insiam tha ang u, tiin ram mipuite a sawm a ni.
Chief Minister hi Indian Society on Tobacco & Health ten Patron Member Certificate an hlan a. He ni puala Essay inziahsiak an buatsaih lawmman a sem nghal a ni. Lawmman dawngtute chu: pakhatna K. Lalthapuii, Class 6, Zomuansanga Elementary School, Mission Veng; pahnihna Lalruatdiki, class 7, Holy Missions School, Bungkawn leh pathumna Vanlalrinhlua, class 8, Govt. Bungkawn Vengthar M/S te an ni.8
Pi Lalrinpuii, Health Minister pawhin thusawiin, World No Tobacco Day, Chief Minister hova hlawhtling taka buatsaih a ni chu lawmawm a tih thu a sawi a. National Tobacco Control Programme hnuaia sawrkarin hmalakna a neih te leh naupangte hnena zirtirna uar taka kalpui a tulzia a sawi a. Sim duh mahnia sim mai thei lo te chuan district hospital tina Tobacco Cessation Clinic te pan thin turin a chah a ni.
He hunah hian Dr. Eric Zomawia, Mission Director, NHM chuan kumin thupui “Protecting children from Tobacco Industry Interference” hmangin thu a sawi a. Meizial pangai ang thova e-cigarette pawhin taksaa thil tha lo a thlen theih thu a tarlang.
Inkhawm hi Dr. Vanlalsawma, Principal Director, Health & Family Welfare in a kaihruai a, Upa Lianngura Sailo chuan hunserh hmangin Dr. H. Lianthangpuia, State Nodal Officer, NTCP kaihhruaiin kalkhawmten thutiamna an nei a ni.
Inkhawm hi Pu VL Bela, Vice President, ISTH, Mizoram chuan lawmthu sawiin a khar a ni.
