Vawiin khan Mizoram Police chuan thuchhuah siamin, “Tun hnaiah hmun hrang hranga ILP check an neihnaah hnam dang mi, Inner Line Permit mumal nei lo leh ILP dan bawhchhia eng emaw zat hmuhchhuah a ni” tiin ILP neitu leh a Sponsor-tute hian a hnuaia tarlan ang hian tihtur leh mawhphurhna, ṭha taka an zawm tur an neih thu sawiin, hetiang hian thuchhuahah chuan an tarlang a ni.
Sponsor chuan hnamdang (non-tribal) a chhawrlai chu Mizorama a awm chhungin a nungchang/chet tlat danah mawh a phur ang. A hnathawhna ah mamawhna a neih tawh loh chuan a thawn haw na tur thlengin a buaipui tur a ni. Chubakah DC in hetianga ti tura thu a pekin a ILP chu a rawn pe kir (surrender) tur a ni.
Sponsor chuan pass neitu (non-tribal) a chhawr chu a pass-a a hnathawh tur inziak ang ngei a thawk a ni tih a hre chiangtur a ni.
Sponsorship hi inhlanchhawn theih a ni lova. ILP renew a tul a nih pawhin Sponsor ngei Office ah kalin a renew tur a ni.
Sponsor hian a mi chhawrlai awmna/ khawsakna hmun DC in hriat a duh hun apiangin a hrilh thei tur a ni.
ILP neitu (Pass holder) chu Sponsor hnuaiah bak midang hnuaiah hna a thawk tur a ni lo.
ILP (Pass) chu a thih hma ni 7 (sarih) ah renew tura thehluh ngei tur a ni.
Pass holder chuan a pass chu Magistrate / Police Officer / Constable duty emaw leh Sorkar hnathawk DC in hemi chungchanga mawhphurhna a pek te hnenah a tul chuan a permit/ pass chu hmuhtir theih turin a dah reng tur a ni.
Sponsor emaw pass neitu reng reng in BEFR Act, 1873, 1930-a siamthat ang emaw dan dinglai dang emaw a bawhchhiat chuan emaw thudiklo (wrong information) a hriattir chuan hrem theih a ni.
Kan ram chhunga ILP nei lo leh ILP dik tawk lo hmanga khawsa an awm lohna turin Mizoram Police chuan a khat tawkin ILP a check reng dawn a, ILP dan zawm lote chungah dan anga hma lak zel a ni ang.
