YMA General Conference 2025 thlirlawkna chu vawiin July ni 25, 2024 (Zirtawpni) chawhnu dar 1 hian Pu Lalchhandama Ralte, Tuivawl bialtu MLA hoin Sakawrdai Community Hall-ah neih a ni.
He hunah hian Sakawrdai khuain kum 2025, October thlaa YMA inkhawmpui lian a thlen turah kawng hrang hranga inbuatsaihna kalpui dan tur sawiho a ni a. He hunah hian Sakawrdai khawchhung a kohhran, political party leh tlawmngai pawl hrang hrang aiawhte bakah Sakawrdai khaw thenawm Thingsat leh Vaitin atangin khawtlang hruaitute an tel bawk a ni.
He huna thusawitu Pu Lalchhandama Ralte, Tuivawl bialtu MLA chuan, “Ka bial chhung Sakawrdai khuain YMA General Conference-2025 a thleng tur hi lawmawm ka ti a. He hunah hian chhungkaw tin in palai atam thei ang ber kan thlen theihna turin inbuatsaihna tun atanga kan kalpui a ngai a, YMA inkhawmpui neih tawh zawng zawnga palaite hriatreng tlak Sakawrdai khawpuiin kan siam theihnan khawtlang mipui zawng zawngte kan tanrual a ngai a ni,” a ti. Pu Chhantea chuan bialtu MLA a nih ang pawhin theihtawp a chhuah dawn thu sawiin, sawrkar lamah tul leh buaipui ngai a awm a nih pawhin theihtawp a ke a pen dawn thu a sawi bawk a ni.
Kum 2025, October thla a Sakawrdaiin YMA General Conference a thlen tur atan hian Organising Committee member mi 35 inruatin hmalakna kal chhohpui mek an ni a, Sub-Committee hi pasarih (7) din ni tawhin Organising Committee thutkhawm vawi 4 neih tawh a ni.
