Vawiin khan Er. Ginzalala, Adviser to CM (Technical) chuan a pisa ah NHIDCL hotute kawmin, National Highway 306 leh NH 6- in a paltlang Vairengte leh Kolasib inkara 4-Lane kawngpui siam chungchang a sawipui.
Adviser to CM chuan he kawng siam hna chak zawka thawk turin NHIDCL chu a duh thu a sawi a. NHIDCL lamin Forest Clearance leh harsatna dang an tawh chungchang pawh sawiin Pu Laltea chuan theihtawp a chhuahpui tur thu a hrilh a ni.
Adviser to CM Pu Laltea chuan NHIDCL chu kawngpui siama hmasawnna hna an thawhna ah kan environment min dim sak hle tura a duh thu sawiin, a remchang lai laia leivung paih liam mai lova mumal taka a theih chin china Soil Bank siam a tul thu leh chutianga hma lak dan tur te a sawipui bawk a. Soil Bank siam hi leivung paihna mai ni lovin a hnu zelah mipui tana tangkai- Park siam zui nan te, truck chawlhna atan te, kawngpui kual lutuk tur pawh ngil nan te leh tangkaina dang tam tak a neih zui theih dan rur te NHIDCL hotute a hrilh a, chutiang taka hma la tur chuan a chah a ni.
Heng bakah hian thingtlang lama kawngpui kan sialin kawngpuiin a paltlang khua te chu hun lo kal zel tura an khaw zauhna leh changkanna dang keng tel thei tura kawng zawn thiam a tul thu Technical Adviser to CM Pu Laltea chuan NHIDCL hotute chu a hrilh bawk a. Hetianga hma la tur hian Mizoram Sawrkar chuan a beisei a ni tih a hrilh a. India leh Myanmar ramri hrula kawngpui pawimawh tak kal tur pawh chak zawka hma lak a, hna tan vat ni se tiin Pu Laltea chuan NHIDCHL hotute a chah bawk a ni.
NHIDCL hotuten pawhin Adviser to CM thurawn te chu tha an tih thu leh lo zawm ngei an tum tur thu an sawi bakah NH 06 leh 306-a harsatna an tawhte sutkian kawnga hma lakpui a tum avanga an lawmthu an sawi bawk. Meeting ah hian NHIDCL lam hi Er Virender Jhakar, CE in a ho a ni.
