Vawiina MPCC thuchhuah chuan, “Kar kalta Ningani, ni 14 April, 2022 khan Armed Veng South Community Hall-a Aizawl East II Block Political Traning neihnaah Aizawl East II bialtu Robert Romawia Royte chuan, ‘Kan Chief Minister Pu Zoramthanga anga thil tithei leh taima hi hmun dangah an awm ve lo’, tia a sawi leh, ‘Congress President thar, Aizawl East II mipui mamawh chhang thei lotu hian Zoram mamawh hi engtin mah a chhang thei lovang,’ tia a sawi ngam hi Congress Party chuan a ngai thu tak hle a. Zoram mipuiten an hriat chian pahnih Chief Minister Pu Zoramthanga leh Finance Minister hlui, a that zia mipuiin an hriat vek Pu Lalsawta chungchang Pu Robert Romawia’n hetiang taka a sawi duh hi a â der leh ta mai em ni, tih kan zawt a. Aizawl East – II huamchhungah Pu Lalsawta’n hmalakna liantham leh rotling tam tak a siam chunga hnathawk lo ang maia a chhuah lui duh tlat hi Congress Party chuan a tha lo kan ti hle a, a bialchhung a hrechiang lo hleah kan ngai a ni.
“CM Pu Zoramthanga thil tih theih leh theih loh hi Aizawl East II mipuite hi a hre chiang bertu an ni a. Kum 2018 September thlaa MNF Aizawl East II Block Conference-ah MNF President chuan, ‘Aizawl khawpui hi Traffic Jam awm lohna State Capital-ah chuan a awm chhun a ni an tih turin kan siam dawn’ tiin Aizawl East II mipuite hnenah a sawi a. Tunah chuan Aizawl chu India ram State Capital Traffic Jam nasatna ber a ni thung. Tin, MNF President hian an sorkar a nih chuan Aizawl khawpui atanga Assam Rifles sawn chhuah an ni ang tiin Aizawl East II MNF Block Conference-ah a sawi bawk a. Tun thlengin sawn chhuah an la ni lo bawk a ni.
“Congress Sorkar liam taah khan Finance Minister Pu Lalsawta chuan Aizawl East II huam chhunga mi ngei Bazar pui sak thatna tur cheng vaibelchhe tam tak a dah laiin vawiin ni thlengin Pu Zoramthanga kaihhruai MNF Sorkarin ala sa puitling thei lo a. Heti chunga Chief Minister Pu Zoramthanga chu thil tithei leh taima tia Pu Robert Romawia Royte in a sawi duh hi Pu Zoramthanga tih mualpho tumnaah Congress Party chuan a ngai hial a ni.
“Congress President thar Pu Lalsawta lakah Zoram mipuiten rinna an nghat mek a. Amah anga eirukna kawnga fihlim hi an tam lo hle tih hi a hretu chu Zoram mipuite an ni. Finance Minister a nih laiin Mizoram Sorkar leiba nasa taka tihhniam niin a hun takah sorkar hnathawk ten hlawh an la a. Pu Lalsawta zarah Mizoram chu India ram State-ah GSDP leh Per Capita Income sâng pawl tak kan ni phak a ni. Pu Lalsawta hi Finance Minister a nih laiin mi retheite Health Care bill a hun taka pek chhuah thin niin Health Care bill bat sak an awm ve ngai lo, tih lo hre turin leh MNF Sorkar nge Congress Sorkarin Finance Minister nei tha zawk tih lo ngaihtuah nawn turin Congress Party chuan Pu Robert Romawia Royte hi a chah a ni,” tiin a tarlang a ni.
