Vawiin August ni 9, 2024 (Zirtawpni) hian MNF party chuan Mizo Hnam Runah chhung inkhawm an neih a, hun hnihnaah Pu Lalmuanpuia Ex-MLA, General Secretary chuan AMC Ward-VI, By-election Common Candidate, Pi Lalrinfeli inhmelhriattirna a nei.
MNF Senior Vice President Dr.R.Lalthangliana chuan he inthlan lo awm turah hian MNF chu a mala a din loh chhan a sawi a. MNF nomination committee bakah NCC leh PAC-te nen uluk taka ngaihtuah a ni a. A tul anih chuan thawhho pui neih kan titlu ta a. Congress pawhin ngaihtuahna sengin candidate tur hial pawh an lo hual ru tawh a. Corporator boral ta, Pu John Zosangliana nupui Pi Lalrinfeli hi lusun mek a ni tih hriain an ngaihtuahnaah a lo awm ve reng a. Pu John Zosangliana nupui fanauten mittui nen hun an hman laiin; Congress pawh kan kar vang ni lovin, Pathian remruat liau liau a ni a, tiin lai leh laiah intawkin lungrual takin kan thawkho thei ta a ni, a ti. MPCC General Headquarters leh ward chhunga Congress hruaitu zawng zawngte chungah MNF General Headquarters hmingin lawmthu a sawi.
MNF Senior Vice President chuan hman ni lawka MP (LS) inthlan vote hmuh kha he lai ward-ah hian tehfungah an hman chuan Congress leh MNF common candidate chu chiang taka a tlin ngei a beisei thu a sawi a. He thawhlohnaah hian an karah tuten emaw hem thlak an lo tum pawhin, an thu tiamah nghet taka an din tlat tur thu leh agreement anga khawng taka an kal tur thu a sawi bawk.
Pi Lalrinfeli Congress & MNF common candidate, AMC Ward-IV, by-election pawhin thu tawi sawiin, an pa hmun ruak luahkhat turin Congress leh MNF-ten an sawmna chu zahawm a tih em avanga lo pen chhuak anih tih a sawi a. A pasalin a boral sanna chu nimin lawk anga a la hriat thu te, a lo hlawhtling ta hlauh anih chuan party awn bik nei lova a kal tur thu a sawiin an pa hmabak tha taka chhunzawm zel a tum tih a sawi a ni. Thu a sawi zawhah Pi Mafeli hi Congress Bhavan-ah thusawi turin a chhuak leh nghal a ni.
