Vawiin ni 9, August 2024 hi International Day of the World Indigenous Day (Indigenous Day) a ni a. Tualto hnam te Ni hi kum 1994 atang khan UNO chuan a hmang tan a. Mizoramah pawh ZORO bultumin kum tin hman thin a ni.
Kum 2024 hian ZORO Divisional Headquarters, Lunglei bultumin Saikuti Hall, Lunglei-ah hman a ni a. Khuallian atan Pu Lalbiakzama Assembly Speaker hman a ni a. Pu V. Malsawmtluanga MLA chuan khualzahawm niin a hmanpui bawk a ni.
Lunglei Saikuti Hall-a World Indigenous Day hman hi Pu Sailothanga ZORO Division Hqrs Lunglei President in a kaihruai a, khuallian leh khualzahawm bakah Pu R. Sangkawi President leh Pu Lalmuanpuia Vice President te pawhin thu an sawi a ni.
He huna thusawitu khuallian Pu Lalbiakzama chuan, “UNO chuan Indigenous People (Tualto hnamte) hi a ngai pawimawh hle a. UNO chuan hnam lian zawk leh chak zawk ten an awpbeh mek tualto hnamte chhanchhuah an nih theih nan UN Declaration on the right of Indigenous Peoples chu ni 13, September 2007 khan a lo siam tawh a, he UN thupuan hi tualto hnam ten kan hman tangkai thiam a ngai hle a ni. Kan ram china kan thuneihna leh kan hnam zia humhalhsak kan nihna te, mimal leh hnam anga kan dinchhuahna tura kan dikna chanvo te hi mipui hian kan ngaihven reng a ngai a ni.”a ti a.
Pu Zamtea chuan, “Tun maiah mahni a ro inrel hnam ni lo mah i la, khawvel sawrkar ramri kham in min daidanna karah pawh, tisa leh thinlung inpumkhat a, kan dam leh tlang khatah, kan thih leh ruam khatah kan ti tlat chuan, khawvel a hnam zahawm kan ni zel dawn a ni. Zofa te hnam anga kan impumkhatna leh kan dinchhuahna a lo nih theihna turin, World Indigenous Peoples’ Day ah hian Zofa unau zawng zawng te duhsakna sang ber ka hlan a che u.”a ti bawk
Khualzahawm Pu V. Malsawmtluanga chuan, “Zohnahthlak unaute in ram a buai avangin Mizoramah in awm a, in tawrhna kan tawrhpui che u a, in harsatna hi kan harsatna a ni ang. Kan sorkar pawhin in tan theihtawp chhuahin hma la thin a, Sorkar pawh in tan kan ding zel dawn a ni. Thalai ten Zohnahthlak inpumkhat theih nan hian tih ve theih kan nei a ni. Thalaite Zofate kan insuihkhawm theih nan hma thar i la tlang ang u.” a ti.
Lunglei Saikuti hall-a World Indigenous day hmannaah hian Myanmar MP te, Bangladesh Palaite leh Tripura palaite atangin thusawi ngaihthlak a ni a. Hnam lam chi hrang hrang entir a ni bawk.
Vawiin tlang hrang hrang a Zofa kalkhawmte chuan hetiang hian resolution an pawm.
1. Zofa; India, Myanmar leh Bangladesh Sorkar awp hnuaia chengte hi hnam khat, thlahtu thuhmun, thisena inzawm, tawng khat hmang (Tawng khat, chibil tawng hrang hrang nei) hunphung thuhmun, serh leh sang inkhawih pawlh, beiseina hruikhat vuana, ‘Dam leh tlang khatah, thih leh ruam khatah,’ ti thin unau dik tak kan ni.
2. British-in an ram awp remchan dan ang Zofate luah ram an then hrang a, mipuite min then darh a, kan dikna chanvo min tih chhiatsak hi kan tan anchhia a ni a, Zo Re-unification Organisation(ZORO) in Zofa, then darha awm tawhte, kan dikna chanvo nei let leh tura insuihkhawm leh tura hma an la hi a dik kan tiin kan pawm a, tharum thawh loa, dikna hmachhuana insuihkhawm tura beihna hi tha kan ti a, kan thawp tlat a ni.
3. Zofate insuihkhawm lehna tura Zo Re-unification Organisation(ZORO) in a beihna hi India, Myanmar leh Bangladesh Sorkar a awm Zofa zawng zawng ten thlawp tlat a kan insuihkhawmna tura thawk tlang turin kan ngen e.
