August 13, 2024 (Tuesday) :
AMC Ward-VI Bye-Election, August ni 22, 2024-a awm tura campaign kal mek chhunzawmin tukin khan Chanmari West MPCC leh MNF Unit ten Joint Meeting an nei a. MPCC Vice President Pu C. Ngunlianchunga, MLA leh MNF Sr. Vice President Dr. R. Lalthangliana ten an hmanpui.
MPCC & MNF Unit Joint Meeting neihnaah hian Bye-Election Campaign neih meka hma lak chhunzawm dan turte phur takin ngaihtuah ho a ni a. Party hruaitute hnen aṭangin fuihna thu pawimawh tak tak ngaihthlak niin, AMC Ward-VI Bye Election-ah MPCC & MNF Candidate inṭawm Pi Lalrinfeli’n hnehna a chan ngei theih nan party pahnih ten inlungrual taka thawhhona thuthlung an siam vawng nung tlat chungin a tawp thlenga theihtawp chhuah zai an rel.
Tukina inkawmhona hi Pu KC Gangte In, Chanmari West-ah neih niin, MPCC GHQ Secretary Pu Lalchhuanmawia, Chairman, Joint Campaign Committee-in a kaihruai a. Party pahnih hruaitute – MNF GHQ aṭangin Pu K. Lalthawmmawia, PAC; Pu Ngurzamlova, Adviser; Former MLA (North III A/C) Pu C. Lalmuanpuia, GS; Ex-MLA Dr. ZR Thiamsanga, GS; AMC Dy. Mayor Pu R. Thanglura, Secretary, Pu Isak Malsawmtluanga, Secretary te leh Party hruaitu dangte an tel a. MPCC GHQ aṭangin AMC Corporator Pu Rosiamngheta, Secretary; Pu Lalchhuanmawia, Secretary; Tv. C. Lalrochhara, GS, MPYCC te leh hruaitu dangte an tel a. MPCC North III Block President Pu Lalrozama leh MNF North III Block President Pu J. Dengdailova te an tel bawk a ni.
“Pi Lalrinfeli, MPCC & MNF Common Candidate lo vote ṭheuh turin Ward-VI mipuite khawngaihna kan ngen nawn leh a ni,” an ti.
