Aizawl, April 19 : Vawiin khan Art & Culture Department bul tumin Muallungthu Model Village ah Art & Culture Public Relation and Outreach programme hman
a ni a. Pu Hmingthanzuala, Director Art & Culture Department chu khuallian a ni.
Muallungthu hi sawrkar laipui ruahmanna – Sansad Adarsh Gram Yojana(SAGY) hnuaiah Mizoram M.P(Lok Sabha) Pu C.Lalrosanga’n Model Village ah a lo puang tawh a. Vawiina Art & Culture Public Relations and Outreach Programme hawnna inkhawm, Muallungthu Community hall-a neih hi Pu R.Lalhmangaiha, Chairman, Model Village Working Committee in a kaihruai a. Pu Lalchuailova, Deputy Director, Art & Culture Department in report a pe a. SAGY kaltlanga sawrkar laipui hmalakna ah hian ‘hmasawnna chu thingtlang khua atangin a intan tur a ni,’ tih a nih angin Model village ah ngei vawiina programme hman a ni chu a inhmehin lawmawm a tih thu a sawi.
Vawiinah chuan Model Village Muallungthu pualin Tribal Research Institute(TRI) leh Mizoram Publication Board ten Mizote tana lehkhabu rotling tak tak te a duh apiang tana lei theihin an pho chhuak a. Mizoram State Museum leh Mizoram State Archive ten Museum & Archive item chi hrang hrang pho chhuakin Exhibition an nei bawk a ni.
Chawhnu hunah Kawn Field Muallungthu ah Outreach Programme hman chhunzawm a ni a.Hetah hian Mizo hnam lam chi hrang hrang leh zaite entir leh ngaihthlak zui a ni.
