Aizawl, April 20 : Vawiin chawhnu dar 1 hian Ex-Mizo National Army Association (Ex-MNA) General Assembly Vawi 11-na chu Dawrpui Multipurpose Hall-ah hman a ni a. Rorel inkhawm neiin resolution an pass a, Mizo hnam tana martar-te leh member boralte sunna hun an hman bakah pawl hruaitu thar an thlang bawk.
Khuallian Pu K.Vanlalauva, Ex-Minister, MNF Treasurer chuan thusawiin, zalenna sualtuten kan tlin loh vang leh kan peih tak loh vang ni lovin, mipuiten lei rem rap phawt ila, zalenna a mit lovang, remna i zawng phawt ang tia remna nen an lo chhuah dan a sawi a. Miten Mizo hnam sipaite an hmuhsit loh nan inpumkhat tlat a tul, a ti.
“Kum 1966 atanga tun thlenga awmkhawm kan ni,” tiin, MURA leh sorkar hmasa khan point 20 agreement an ziaka mahse engmah tihhlawhtlinsak an ni lo. MURA-ten sorkar nawra chaw an nghei laia a tlawh thu leh tanpuina an pek thu sawi langin Mizo hnam sipaite chu inlainata inlungrual tlat turin a chah.
Pu Auva chuan, MNF sorkar din, Martar thlamual committee chu kar kalta mai khan an thutkhawm thu leh a hmun an tlawh thu a sawi a. Martar thlanmual chu 4.5 Bigha vela zau niin, hall lian a sak theihna tur leh chei chhunzawm tur a nih thu a sawi.
“Peace Accord MNF Returnee leh Ex-MNA awm mah se, kan tum thuhmun a ni a. Kan thian MURA-te pawh an la nung tek tek a. Keiniho hi i inpumkhat tlat ang u, kan inkarah eng agency mah awm suh se,” a ti a. Ramhnuaia an thil tawn tam takte hre renga inhmangaih tawn tlat turin hnam sipaite a sawm a ni.
Ex MNA khawmpuiah hian hetiang hian resolution an pass:-
“Covid 19 hriin hun rei tak min chenchilh a, vawk hri a leng a, ram kang kan tuar a, Refugee thahnem takin min chenchilh bawk a, chutiang karah chuan ei leh barah harsa lovin vawiin thlengin kan awm a, eirawngbawlna gas pawh kan hnianghnar a, harsatna hnuaiah pawh hruaitu rintlak Chief Minister Pu Zoramthanga kan nei hi lawmawm kan ti a, kan chhuang takzet a ni.
“Aizawl khawpuia lirthei tawt tihziaawmna tura lei verhna tur pawisa Central Sawrkar a kar chhuak a, bul tan thei tura hmalak a ni thei ta hi lawmawm kan ti takzet a ni.
“Kum 2018-a MLA General Election MNF Manifesto Political 4-na thu angin Hnam Sipaite leh Martar chhungte chhawmdawlna tur ruahmanna min siamsak turin MNF Sawrkar hi kan ngen a ni.
“Kum 2023-a MLA General Election awm turah kan Chief Minister Pu Zoramthanga kaihhruai hian hnehna a chanpui ngei kan ring a, a tihlawhtling turin rinawm takin a kan zui zel dawn,” tiin.
