“Vawk pûl hri (African Swine Fever) tuartu te zangnadawmna a rang thei ang bera pe chhuak turin PC Ṭhalaite ‘n Mizoram sawrkar kan phut a ni,” tiin vawiin khan PC THalai chuan thuchhuah a siam.
Thuchhuahah chuan, “Nikum March 2021 atanga December 30, 2021 thlenga ASF avanga Vawk vulha eizawngtu kut benga awm zawng zawngte zangnadawm nana sawrkar laipuiin Rs 5,84,97,000 Mizoram sawrkar kuta a rawn pek tawh , vawiin thlenga Mizoram sawrkarin a la hup bet reng mai hi PC Ṭhalaite chuan hriatthiam harsa kan ti a. A changtu Minister Dr. K.Beichhua kan dem takzet a ni.
“Hetianga chhiat tawkte ṭanpuina tura sawrkar laipuiin sum fai ṭhahnem tak a rawn pek tawh pawh, sem mai thei lo sawrkar kan hrawn hi PC Ṭhalaite chuan a vanduaithlak kan ti takzet a. Hei hian MNF sawrkarin kuthnathawktute a ngaihthahzia pawh a tilang chiang hleah kan ngai a. A rang thei ang bera a dawngtu turte hnenah pe ngei tawh turin PC Ṭhalaite chuan Mizoram sawrkar kan phut tak meuh a ni,” tiin a tarlang bawk.
