Mamit April 21 : Vawiin khan Er. H Lalzirliana, MLA/Vice Chairman, Roads & Infrastructure Development Board chuan Mamit District chhunga School hrang hrangte tan Text Book, Sanitary Pads/Vending Machines leh Incinerators ( Sanitary Pads hal ralna) semna a nei.
Er. H Lalzirliana chuan zirtirtu tha leh hlawhtling tehna tur chu kan zirtir naupang mi hlawhtlingah kan chherchhuak em tih a nih avangin zirlai naupangte theihtawpchhuaha zirtir tur leh an rilru-ah tumna sang tak an neih theih nana fuih turin zirtirtute a chah a, Kan bialchhung khaw 15 ah Health Clinic pawh neilo kan la awm avangin naupangte hriselna atana hmanrua sem a ni chu lawmawm a tih thu a sawi. SEDP hnuaiah Health Sub-Centre din tura hmalak mek a nih thu a sawi bawk.
Khuallian hian Sanitary Pads, Vending Machine leh Incinerator District chhung School 93 a sem tur leh Free Textbook Zawlnuam leh West Phaileng Block Elimentary School hrang hranga sem turte hi a vailiam a ni.
Pu Lalnunhlua District Bawrhsap/District Education Chairman pawhin hrileng avanga kum hnih chhung School kal theihloh hnu-ah mumal taka School kan kal thei leh a thlawna zirlaibu sem a ni chu lawmawm a tih thu a sawi a. Hrilengin ziaawm lam a pan chhoh laiin fimkhur tak chunga, zirlai naupangte leh zirtirtute Covid Appropriate Behaviour (CAB) tha taka zawm turin a chah a, zirlai naupangte chu an vanneihzia in hria-in thahnem ngai taka an zirlai bute zir turin a chah bawk.
He hun hi Pu PC Lalngaizuala, District Project Coordinator, Samagra Shiksha, Mamit District chuan kaihruaiin Pu H. Darhmingliana, Dy. District Project Coordinator (E) chuan vending machines leh Incinerators hman dan zirtirna a nei a, Pu Emmanuel Chhakchhuak, Addl. District Project Coordinator, Samagra Shiksha chuan lawmthu sawina a nei bawk.
