Vawiin chawhma khan Pu Indra Sena Reddy Nallu, Tripura Governor chu Durbar Hall, Raj Bhavan-ah rinawmna thu tiam tirin Mizoram Governor Dr Hari Babu Kambhampati chawlh lak chhunga Governor hna thawk turin lakluh a ni.
Chief Secretary Dr Renu Sharma in President thupek chhiar hmasain Governor lakluh inkhawm hi tan a ni a. He hunah hian Justice Nelson Sailo, Judge, Gauhati High Court chuan Pu Indra Sena Reddy Nallu chu rinawmna thu tiam tirin Mizoram Governor hna thawk turin a lalut a ni.
Swearing-in Ceremony-ah hian Chief Minister Pu Lalduhoma, Speaker Pu Lalbiakzama, Home Minister Pu K.Sapdanga, Cabinet Minister dangte, Minister of State te, Lok Sabha MP, Chief Secretary, DGP leh special invitee dangte an tel a ni.
Pu Indra Sena Reddy Nallu hi 31st March 1949 khan Nalgonda District, Telangana a thingtlang khaw pakhat Ganuga Banda-ah a piang a, a nu leh pa te chu Pu N. Ram Reddy leh Pi Hanumayamma te an ni a. A nupui Pi Renuka Nallu nen fapa pathum an nei a ni.
Pu Indra Sena Reddy Nallu hi kum 1983, 1985 leh 1999 khan Undivided Andhra Pradesh-ah term thum chhung MLA a ni tawh a, kum 2003 khan BJP state president hna chelhin kum 2014 khan BJP National General Secretary atan ruat a ni bawk.
