Aizawl April 21 : Department of Labour, Employment, Skill Development & Entrepreneurship hmalaknain vawiin khan Aijal Club-ah National Apprenticeship Mela 2022 hman a ni. He hun hi Pu Zothantluanga, MLA, Vice Chairman, Man Power Development Board in a hmanpui a. Mr. S. Mathivanan, Regional Director, Regional Directorate of Skill Development & Entrepreneurship leh Miss Darisa Kharwanlang, Training Officer, National Skill Training Institute ten State pawn atang he hun hi an rawn hmanpui bawk a ni.
He huna khuallian Pu Zothantluanga chuan thusawiin, Apprenticeship Mela hi Mizo thalaiten eizawnna an hmuhna tur leh an thiamthil mila eizawnna tur inkawhhmuhna hun pawimawh tak a ni a ti a. Them thiamna lama eizawnna hi kan uar deuh deuh a tul tawh a, thlalai nun beisawng tak takte khai chhuak tur hian he huna kalkhawmte hi kan pawimawh a ni tih hre rengin, hemi kawnga thahnemngai taka hma la zel turin kalkhawmte a chah a. Kan thalaite tana malsawmna thlentu ni zel thei tura kan company/firm theuhte pawh kan tih len zel theih nan kalkhawmte duhsakna a hlan a ni.
Apprenticeship Mela hun kawngtu Pu K. Lalhmingliana, Director, LESDE chuan Establishment lo kal khawmte chu ram economy ti changtlung tura a fawng chelhtu mi pawimawh berte an ni a ti a, Mizorama skill ecosystem ti changtlung a, hma a sawn zel theihnan LESDE Department nen a thawk ho zel turin a chah a ni.
He inkhawmah hian Pu Lalmuanawma, Deputy Director, LESDE chuan Apprenticeship Mela chungchang sawifiahna hun a hmang a, Apprenticeship Act hnuaia hna pe tute tana hamthatna awm theite hrilh hriat an ni bawk a. Miss Darisa Kharwanlang, Training Officer, NSTI chuan National Apprenticeship Promotion Scheme leh National Apprenticeship Training Scheme kalpui dan turte, State in tihtur a neih leh a mawhphurhna bakah, Mizoram thalaite a tam thei ang ber he scheme hnuaia train theih dan tur chungchang sawina hun a hmang bawk a. Mr. S. Mathivanan, Regional Director, RDSDE pawhin LESDE Department hmalakna a hetiang hun hlawhtling tak hman ani thei chu lawmawm a tih thu a sawi bawk. Dr. JT. Vanlalngheta, Jt. Director, LESDE in lawmthu sawiin hun a khar a ni.
National Apprenticeship Mela hi India ram pumah 21st April hian hman vek a ni a, he mela in a tum ber chu Apprentice ni duhte leh ruai theite tana in tawh khawmna hun lo buatsaih hi a ni. Vawiin inkhawmna neih lai hian Portal hmanga registration hawn a ni a, Establishment 35 rawn tel theiin, Apprentice tura in register hi 50 chuang an awm bawk a ni.
