Vawiin April ni 22, 2022 hian Congress Bhavan-ah MPCC Friday Political Session neih a ni a, Political session hi Pu H. Lalzamlova, Gen. Secretary, MPCC-in a kaihruai a, report hrang hrang ngaihthlak a nih bakah Pu Lal Thanzara, Vice President, MPCC-in thu a sawi bawk.
Pu Lal Thanzara, MPCC Vice President chuan MNF chu BJP nena an thawhhona chungchanga thu dik tawk lo sawi thin an ni tih sawiin, “Mizoram chhim lama thu a sawinaah Pu Zoramthanga, CM hian ‘BJP hotute Pathian biak atang hian inzawm chi kan ni lo’ a ti a. BJP nen an thawh dun nasat dan ngaihtuahin he thu sawi hi dawt chiang tak a ni tih ka puang duh a ni,” a ti. “MNF party hi North East Democratic Alliance (NEDA)-ah member niin BJP nen an thawk dun tlat a. Kum 2018 inthlanah pawh khan an candidate zawng zawngin BJP atangin tanpuina pawisa an dawng vek a, pawisa rawn petu pawh tuna Assam CM ni ta Himanta Biswa Sharma khu a ni,” a ti.
Lengpui Airport chei that mek chim chungchang sawiin, “CM berin sum siam nana Lengpui Airport hman a duh avangin a hman tangkai theih tur mi thuneituah a dah sauh sauh a, Airport cheithat hna chu an sangawizawnpui Kamrula Chhangte an thawh tir ta chat a ni. Mahse, chung lamin tha a ti lo aniang, a chim ta rup mai a nih kha. Sorkar pangngai chu nei ila, Lengpui Airport chim kha Enquiry Committee din a, chhui fiah ngei ngei tur chi a ni,” a ti.
Pu Lal Thanzara chuan MNF thutiam reng reng hlawhtling a awm ngai lo tih a sawi bawk a, “Inthlan dawnah MNF hian mipuite thil tam tak – Kawngchhawng siam te, cheng nuai 3 semte min tiam a. Tunah an term a tawp tep tawh a, inthlan dawna an thutiam pakhatmah thleng dik a la awm lo. Mizoram leiba cheng Vbch. 9881 zet kan nei chho ta te hi CM-in sum enkawl thiam loh vang a ni lo ti tlat mah se, sum enkawl thiam vang chu a ni lo chiang hle. Dr. Thiamsanga’n Healthcare chungchang dik lo taka a sawi maite kha a mak hle. Health care kalphung tha zawka siam a, chingfel vektu chu Congress sorkar a ni. Congress sorkar laiin Healthcare bill pek theih loh a awm ngai lo. MNF sorkar chuan karkalak ti zauin natna zawng zawng deuhthaw bill theihin a siam ve ringawt a, bill an pe leh thei si lo a, mipui sum cheng vaibelchhe tam tak an ba reng ringawt mai a ni,” a ti bawk.
Pu Lal Thanzara chuan ZPM chungchang sawiin, “ZPM hian kalphung hlui ti a nasa taka an aupui thin, tih bo an tum MLA hlawh tihhniam te, MLA car leina senso sang lutuk te, Unit system nuai bo te, inlawmluh bung bung te, Chakma tel lo a sawrkarna siam an tumte chu an bawhchhe leh vek tawh a. Designation plate tar loh an aupui laiin an MLA-te leh AMC Councillor-te chuan permanent-in an tar leh si a ni. Kalphung thar an aupui hi anmahni zawkin an bawhchhe leh nghal zel. Chuvangin, rin tak tak tlak an ni lo,” a ti bawk.
Pu Lal Thanzara chuan MLA Candidate nih kher a tum lo tih a sawi a, “MPCC Vice President ni mah ila, kei aia mipuiin an pawm, ram tana sorkar tha pe thei tura an rin zawk an awm a nih phawt chuan ka dinhmun hi ka kian phal a, Candidate nih ngei ngei hi ka tum chuang lo. Ram leh hnam tana sorkar tha kan neih theihna tur a nih phawt chuan ka pawm zel dawn. Sorkar tha siampui turin Mizoram mipui zawng zawng kan sawm che u a ni,” a ti bawk.
