Republic veng chuan 21.4.2022 zan khan IASE Auditorium ah YMA kumpuan ‘Ram leh hnam humhalh’ hawnna hun leh infuihtharhna hun an hmang a. Pu Lalchhuangliana, Vice President in kaihruaiin,Tv. L.Ramdinliana Renthlei, Central Executive Committee(CEC) CYMA & Secretary, Republic veng Branch YMA chuan kumpuan hawnna leh thuchah sawina hun a nei a ni.
YMA kumpuan hawngtu Tv. L. Ramdinliana Renthlei, Central Executive Committee(CEC) CYMA chuan, “Kan ram leh hnam humhalh na pawimawh ber pakhat chu zirna hi a ni. Tun dinhmun a Mizoram Police Lalber DIG chu hnamdang a ni a, Mizoram state sorkar hnathawk Lalber Chief Secretary chu hnamdang bawk a ni. Hnamdang hi department tin head ah an awm vek huna chuan kan tlai tawh ang, Mizo thalaite zirna kawngah tan kan lak zual a ngai hle a, zirna kawngah YMA in a pui thei che u a nih chuan YMA chu zirlaite pui tuirin a in peih reng a ni. YMA activities hrang hrang Khawhar in kal te, Mitthi lumen te, hnatlang te pawh a ni ang kan zirna a ti buai dawn a nih chuan lo tel kher a ngai lo a, YMA ah in hman kher pawh a ngai lo. Kan zirlai kan zawh huna kan ram in min mamawh zawk a ni.” a ti a.
L. Ramdinliana Renthlei chuan, “Ram leh hnam humhalhna kawng pawimawh tak pakhat chu hnam dang nupui pasala neih loh hi a ni a. Hnamdang kan neih chuan kan hnam Mizo hi kan phatsan tihna a ni. A bikin kan Mizo hmeichhiate kan fimkhur zual a ngai.
Hnamdang pasal a nei kan thahnem hle a, chu chuan harsatna min thlen mek a ni. Hei hi kan hriat a tul, hnamdang pasal a kan neih hian kan fate hi Mizo an ni thei tawh lo tih hi a ni. Kan ram leh hnam humhalh tur hian ruat bik kan awm lo a, a te ber leh a lian ber thleng hian kan tih vek tur a ni a, Kan ram leh hnam ti chhe thei tu YMA in kan bi tum chat chat hian kan tih tur dik tak kan ti a ni. He kan ram leh hnam hian mitha ngawi reng a mamawh lo a, a ram leh hnam tan chuan engemaw tal tih tur a nei a, a ti ve tur a ni.”a ti a.
Republic veng YMA kumpuan hawnna hunah hian member kal an tha hle a, kal tura ruat Branch YMA executive member, section YMA executive member leh Branch YMA hnuaia sub-commttee hrang hrang memberte atangin member 230 an kal a ni.
