Ni 22nd October, 2024 Thawhlehni hian MPCC Treasurer, Dr. Lalmalsawma Nghaka chuan Sinlung Hills Council huam chhunga khaw hrangte tlawhin a zin a, kuthnathawkte harsatna tawh pawh a hmunah a ngaithla.
Hmar tlangdung tlawha zin Dr. Mala chuan, “NLUP a hlawhtling lo tia tlangau te khan Sakawrdai leh a chhehvela kuthnathawkte hi tlawh ve sela, an dinhmun zirchiang rawh se. Hmunphiah chin thlangte khan awlsam taka an hralh thin laiin ZPM sorkar a rawn piang a, rate sang zawk tiamin beiseina sang tak an siam sak a. Chu an beiseina thar neih chu an beidawnna thlentu mai a ni zawk tih Ṭinghmun khua leh a chhehvel amite hian an chiang hle a, kum danga hmunphiah an hralh thin chanve pawh tling lova an hralh a ngaih phah ta a ni.
“Sorkar hi an thutiamah an ding em tih lo en rawh u. An intiam anga an ti lo a nih chuan an rawn kal hunah lo chhuah chhal ang che u. MNF an rawn campaign hunah in intiamna Cheng nuaih 3 chu khawi nge, tiin lo zawt ula, ZPM an rawn campaign hunah pawh min hmangaih tak tak a nih chuan kan phurrit chhawk zangkhai turin Ration buhfai leh tuialhthei man min tih hniam sak leh rawh u. Tin, kan hmunphiahte pawh Rs. 100 chuan min lei sak rawh u, lo ti ang che u,” tiin a sawi.
MPCC Treasurer hian Ṭinghmun, Zohmun, Saiphai leh Saipum khuate a tlawhnaah hian Sinlung Hills Council election-ah hian thusawia dingnghet thin Congress tan kawl a en thu sawiin, “Kalphung thar mak tak kan hrawn mek a, mipuiin CONGRESS bawk min enthla leh ta. A meichher chhi eng turin Zoram mipuite ka sawm a ni. Tuna ZPM-a lutte hi bazar an ni a, Congress-a rawn lutte hi mi tak tak an ni zel. ZPM kaltlang hian hmasawnna tak tak a awm dawn lo tih hriate Congress-ah an rawn lut zel a ni,” tih thu a sawi a ni.
