Aizawl, April 25 : Vawiin khan ZPM chuan Chhung Inkhawmna hun kan hmang a. He hunah hian Pu Lalthansanga, Ex-MLA, Vice President chuan thu a sawi.
Pu Chatea chuan Zoram mipuite’n ZPM tobul kan hriat nawn a tul thu sawiin, “ZPM hi pawl 6-in kan policy theuh puluta a din, movement hmanga kum 2018 election hmachhawn kan ni a. Khatih lai khan mipuiin kan la inpeih lo deuha an hriat avangin MLA pariat min pe a. Nimahsela inthlang ram kan nih avangin movement hming pu mah ila movement hlawmpui nih reng a fel lo, chuvangin political party kan ni ta a ni. Chutiang chuan hma kan la tan dawn chauh a, hripui a lo leng a, inthlan a awm zut zut reng bawk a. Chung inthlanah chuan kan kianga awm reng kan Pathianin min hruai a, kan mualphona tur min hliahkhuh thin. ZPM hi Zoram mipui thlaphang chhan tura lo ding a ni a, party dang nen kan inang lo. Party dangte chu central behchhan te, mautam tam avanga tea lo ding an ni. ZPM chu a dang em em a, uluk pawh kan uluk a ni. ZPM-a kalkhawmte hian a mal malin agenda kan lo nei thin a, amaherawhchu tunah chuan Zoram hnam tinte tumah thlauh thla lovin, Pathian duhdana hmasawnna huapzo a awm theih nan leh chutianga rorel a nih theih zawkna turin hma kan la a. Thil tha kan duh em avangin eng emaw chang chuan midangte chu sawi loh, kan mi leh sa te ngei pawh ner nawk khawpin kan chhang fo a, mahse, chu chu Zoram tan a ni. Chuvangin, ZPM hi pastor rual telna tlak a ni a, a tel pawh an tel a. Heng kan hruaitute hi nitin an tawngtai thin. An agenda lian ber chu Rorelna Dik bakah Assembly House-a Pathian duhdan tundin a ni. Chumi piah lam thil, mahni hma kan sial chuan kan tum kan thelh ang. ZPM hi a principle ‘Mipui Sawrkar – Kalphung Thar’ tihah hian a ding reng a ni. Chutiang tak chuan tunah hian chak takin hma kan la chho mek a ni,” a ti.
Pu Chatea chuan ZPM-in VUC thutlukna anga CM Candidate Pu Duhoma a neih thu sawiin, “Party harsatna reng rengah VUC thutlukna hi thutawp a ni. Kan nihphung hi a dang em em a, Pathian leh Zoram tana fatu kan ni. Chumi piah lama kan kal chuan mimal thil a ni a, keimahni chaknaa dinchhuah tumna rilru kan neih chuan paih a ngai. Zoram mipui beisei kan nihna hi engmahin a tihchhiat kan phal tur a ni lo. Political goal te, economic goal te, thil tum fel tak kan nei. Khaw tinte hi an chanvo dik tak pe ila tunge mahni khua chhuahsan duh ang? Hnam tenau zawk (minority) te tan pawh hmun a awm. MADC kan inthlang dawn, bul tan chauh ni mah ila beiseina kan nei sang em em a ni. ADC dangah te pawh engatinge ZPM a lo awm tak ngawt mai, kan ADC unaute hian a tirah chuan political party dang angah min ngai mai thei, kan danglam tih an hrechiang zel a ni. Hun a kal zel a, inthlan a hnai tulh tulh a, ZPM-ah ramthar zia an hmu chiang tulh tulh a ni,” a ti.
