ZPM chuan thuchhuah siamin, “MNF PR No 188/2024 Dt.18.11.2024 -a kan lo hmuh angin, Ex -Minister Pu Lalruatkima MNF Treasurer chuan, ‘ZPM sorkar chu sorkar hnathawkte nêkcheptu, aikal lak khap, Office tan hun leh ban hmaa chhuahsan phallo leh an awmna chin hriat theihna Apps an hmang ṭan dawn a, sawrkar hnathawkte an beidawng mek a, MNF sawrkar leh hun an nghakhlel hle,’ tia a sawi ta mai hi ZPM Thalai chuan mak kan tiin a ngaithlatu mipuite tan a hrilhhaithlak dawn hle ah kan ngai a. Minister hial lo ni tawh ṭawngkam atan chuan thil mawi lo leh inhmeh lo tak niin kan ngai.
“Ex- Minister Pu Lalruatkima hi MNF Treasurer ni lai mek niin, Mizoram (MNF) Sawrkar-ah Minister nihna hial lo chelh tawhtu a ni a. Hetiang Dân pawisak lohna chungchang a sawichhuak ta mai hi, MNF Sorkar lai a Department a chan ṭhin ah te khan Dân zawm kawngah a lo ngaihtuahawm ṭhin zia a pholang chiang hle ah ZPM Thalai Headquarters chuan kan ngai a ni.
“ZPM Mipui Sawrkar kan hrawn mekna hnuaiah hian kan Sawrkar hnathawk te leh Mipuite pawh an hlimin an thlamuang hle a, an hnathawh hlawh an lak danah pawh an lungawi hle a ni. ZPM Sawrkar-ah beiseina sang tak nei a, thahnemngai taka kan Sawrkar hnathawkte an thawh lai a, Dân pawisa lo tura fuihpawrh hi MNF Party-te hian sim se kan duh hle a. Sawrkar hnathawk,mipui rawngbawlsaktute rilruah rinawmlohna leh zelthelna rilru tuhsak duhna thinlung hi MNF party hruaitu leh Minister hial lo ni tawh Pu Lalruatkima hian pu tawh lo se, Office kalphung dân leh dûn hriatna kawngah leh Dân pawisaklohna ata harhchhuak turin ZPM Thalai Headquarters chuan MNF Party te a ngên tak meuh meuh a ni,” tiin an tarlang.
