Mizoram Kohhran Hruaitute Committee (MKHC) chuan thuchhuah siamin, “Manipur buaina kal zelah tun hnaiah Jiribam District chhungah buaina lo chhuak thar lehin mi tam takin nunna an chan a, in leh lote, Biak inte thlengin hal a ni a. He chi leh chi inkara buaina leh Kristian-te thlur bik nia lang lo chhuak thar leh hi MKHC Emergency Meeting November 18, 2024-a thukhawm chuan pawi a ti em em a. Hetianga pawi sawi lote nunna inlaksak te, in leh lo inhal sak leh inrikrapna thlengte hi MKHC chuan a dem takzet a. He buaina hi a reh theihna turin thuneitute, a bik takin Central sawrkar inrawlh thuai a, hma la vat turin kan ngen a ni.
“Hetih rual hian Mizoramah ngei pawh hnam hrang hrangte kan awm a. Lungrual tak leh thlamuang taka kan awm ho zel hi MKHC chuan tha a ti a. Chi bing leh hnam bing zawnga invauna leh inrikrapna te thleng lo turin mipuite i fimkhur theuh ang u, tiin MKHC chuan Mizoram mipuite a ngen a. Tin, Manipur (Imphal leh a chhehvela) Mizo awmte pawh thlamuang taka an awm zel theihna turin thuneituten hma la ngei se tiin kan ngen bawk a ni.
“He buaina hi a lo reh thuai theihna turin Mizoram mipui zawng zawngte leh kohhran zawng zawngte Pathian hnena tawngtaina hlan theuh turin kan ngen a ni,” an ti.
