Vawiin ni 29.11.2024 (Zirtawpni) hian Congress thalai chuan Lengpui panna kawng Tlawng Lei (Bridge) dawh mek ‘Inclined Network Arch Bridge’ hnathawh muang lutuk avanga mipui harsatna namen lova thlen phah mek an tlawh a. Project Manager, Poddar Mirdul chuan Dec 10, 2024 a Lei dawhkai kan tum dawn a, kan dawhkai thei lo anih chuan mipui zawng zawng kal tlang theihin a helna (Road-Diversion) tha zawk Light Motor Vehicle (LMV) chin tlan theihin ka siam ang tih a sawi.
Pu Laltawnliana MPYCC president chuan, “October ni 29.2024 khan Sr. EE, PWD, National Highway Division-l, Aizawl in a dil angin Pu Rahool Alwal, IPS Superintendent of Police, Aizawl to Lengpui road via Sihhmui kawnga Tlawng Lui chunga Lei (Bridge) innghahna nawr thlenna tur kawngpui tan tlanga kaina track siam a ngaih dawn vangin ni 30.10.2024 atanga 30.11.2024 inkar (ni 32 chhung) lirthei eng chi mah tlan phal lohvin kawng khar tura thuchhuah a ni a. Khualzin, mipui mamawh phurtu bakah damlo leh kuthnathawktu Aizawl, Lengpui Airport leh Mamit lam kal tur te pawh harsa takin Buichali lamah kal tir vek an ni.
“Mipui harsa zawk leh dam lo te dan (Block) an nih laia mi hausa zawk leh awm thei zawk, motor nei tha zawkte dan an ni ve lo hi Congress Thalai chuan a hrethiam lo a. Mipui veivahna senso a let engemaw zatin an sen belh zel a ngai a. Damlo leh khualzin te phurrit a thuahhnih nasa hle a. Hetianga mipui harsatna a thlen chunga lei dawh kai hna zawh a la ni lo leh hnathawktu mumal pawh an awm lo hi Congress thalai chuan mipui zahlohna leh ZPM sorkar leh a changtu Minister inthlahdahna dik takah a ngai a ni,” a ti.
Pu Laltawnliana chuan, Tlawng lei dawh that mek, Steel Arch (semi through) Bridge hi Sawrkar laipui Ministry of Road Transport & Highways hnuaia thawh a ni a. Mizoram PWD chuan he hmalakna hi a vil a, EPC Mode-in Poddar Infratech Pvt Ltd. ten lei dawh that hna hi an thawk, tih sawiin, Lei dawh thatna atan hian cheng Vaibelchhe 36,99,00,009/- ruahman a ni a. Nikum 2023 October thlaa zawhfel hman tura tih chu a hun pawh sei niin kumin March 2024-a zawhfel tura tih leh a ni leh chunga tun thlenga zawh theiha peih a la ni lo fo chu Mizoram PWD leh Company he lei dawhtute karah thawhona tha engmah a awm loh vang a ni a. Hei hian a vil (Supervise) tu Mizoram sorkar chak lohzia tarlannaah Congress thalai chuan a ngai a ni, a ti bawk.
Nikum December thla khan leidawh hna hi za zela 74.25% vel zo fel tawh anga ngaih nimahse kum khat a ral dawnah pawh zawh fel a la ni lo hi hnathawktute inthlahdah vang leh ZPM sorkarin mipui harsatna tawh engahmah a ngaih loh vangah Congress thalai chuan a ngai a ni.
Tlawng lei (Lengpui kawng) dawh hna hi India rama Inclined Network Arch Bridge hmasa ber tur nia ngaih a ni a. MT 432 vela rit niin metre 100-a sei tura ruahman a ni a. A zau zawng 7.5m niin lei sanna lai berah 17m a sang a ni. Lei dawh bakah hian a panna kawngpui Aizawl lamah 180m a thui leh Lengpui lamah 265.300m a thui hi an kutah a awm bawk. Hei Lei dawh mek hi mipui harsa zawkte harsatna thlentu anih avangin an intiam anga an awm leh awm loh hi Congress Thalai chuan a enzui zel dawn a ni.
Vawiina MPYCC in Tlawng Lei Sihhmui Kâi/Lengpui Kai an tlawhnaah hian Pu Ngurdingpuia Pachuau, Sr. Vice President MPYCC, Pu Khawpuimawia, Treasurer MPYCC bakah MPYCC General Secretary engemaw zat an tel a ni.
