Vawiin ni 29.11.2024 (Zirtawpni) khan Golden Hall, Congress Bhawan-ah Congress party chuan Political Session an hmang a, he hunah hian MPCC Sr Vice President Pu Lalnunmawia Chuaungo chuan thu sawiin, “Thil tha, ram hmasawnna duh tak takna nena ram kan kaihhruai loh chuan mipui tan thil thalo a thleng thin. Kan sawrkar hian kan ti ang an tih an ti lova, kan ti lovang an tih an ti leh si a, chu chuan a hrin chhuah chu Sum leh pai enkawl thiamloh vang a ni. Sum enkawl chungchangah hian an hlawhchham lailet der ani tih an thiltih hian a tilang a ni. Hmanni lawk ah Village Council term an pawt tawi a, LAD Minister in a chhan nia a sawi chu sum harsatna vang a ni, a ti a. Hei hi chhuanlam tling a ni lo. Lushai Hills Village Council Act 1953 Sec 5 hnuaiah sawrkarin pawhtawi theihna a nei a, amaherawh chu a nawm a maka pawhseia pawhtawi theih a ni lo, a chhan leh vang mumal tak a awm tur a ni.
“Kan Senior Minister pahnihin tun hnaiah VC ten min thawhpui tha duhlo an ti a, Mipuiten kan aiawh tura kum nga chhunga rorel tura kan thlan chhuahte thawhpui duhlohna hi Democracy kalh a ni. Ram leh hnam hmasawnna atan kan VC te hian thawhpui duh loh an nei ngai lo. Congress leh MNF sarkarah pawh a awm ngai lo. Thuneihna hman diklohna, hmansualna dik tak a ni. Keini chuan hei hi tha kan ti lo. Heng te hi sum leh pai enkawl thiamloh rah a ni.
“Congress sawrkar lai khan ka lo chhuak a, Finance Commissioner hna min chelh tir a. Khang hunlai khan State matching share pek theih loh kan nei ngai lo, sawrkar hnathawk hlawh a hun takah pek thin a ni a, pension pek chhuah nghal thin a ni bawk. Chuti khawp chuan Congress sawrkar khan sum dinhmun a sawhnghet a ni. Chumi tichiang tu chu 15th Finance Commission kha an ni, an member te pawh India rama mithiam tak tak an ni. An ni khan an zirchiannaah Mizoram sawrkar sum dinhmun kha a tha tih an hmu a, Congress sawrkar in sum a enkawl that ang zela kal chho tur milin Post Develutionary Deficit Grant te pawh hi a tahtawlin an tihniam a ni.
“MNF khan sum an enkawl thiamlo em em a, an ni aia enkawl thiamlo zawk chu ZPM sawrkar hi an ni. SASCI sum an tih lapse chhan pawh Department ah sum an pekchhuah loh vang a ni a. Sum awmsa kha Minister te chenna in chei nan te, Board Chairman hlawh atan te, tul lem lova sum tamtak an senral vang a ni. Central-in State tan sum an rawn pek Department ah an pechhuak thei lova, State Matching Share kan pe thei lova, chuvangin Vaibelchhe 233 lai an ti lapse a ni. Mizoram ang sum lakluhna dang nei lovin heti zat an han ti lapse ringawt mai hi a uiawm takzet a ni.
“Power Sector te hi technical leh commercial tak a ni a, hriatthiam harsa tak a ni. NEEPCO chungchang kan Power Minister -in hmannia a thusawi te kha thil a hriatchian loh vang leh a man loh vang a ni a. He thu hi sawiho an huam anih chuan kan inpeih reng a ni. Sawisel tum ngawr ngawr vang ni lovin thil diklo a thlen kan duh loh avang leh thil dik hailan kan duh vang a ni.
“Kan Airport pawh hi Air Force kuta hlan tumna a kal zel niin kan hria a. Kan Airport hi tihchangtlun zel a, tih len zel a, tih hmasawn zel kan mamawh a ni. Chumi atana rokhawlhna siam thei tur leh Airport-in hma a sawnna dal theitu tur chu Indian Airforce kuta hlan hi a ni. Indian Airfoce te nena kan Airport neih chhun hman ho hi kan ram leh hnam tan a him lova. Chutiang chu Congress party chuan kan do char char a tul dawn a ni.” A ti.
He Political Session hi Pu MS Dawngliana, Secretary, MPCC chuan a kaihruai a, Pu Israela, General Secretary, ADCC chuan thusawina hun a nei bawk a ni.
