Vawiin December 2, 2024 Thawhtanni hian Venghnuai Local Council kaihhruai in Venghnuai khawtlang chuan Rokunga Hall, Venghnuaiah WBC Youth World Champion Laldinsanga lawmpuina hun an hmang.
He lawmpuina inkhawm hi Local Council President Pu KC Lalrinmawia’n a kaihruai a, CO Remruatkim-a’n hunserh hmangin Vengchhung tlawmngai pawl hrang hrang – YMA, MHIP, MUP leh Dinsanga Fans Club ten lawmpuina thilpek pe-in, Chief guest Dr. Lalmalsawma Nghaka’n Dinsanga World Champion zinkawng a sawifiah.
World Champion Laldinsanga hian kalkhawm mipuite hmaah thu sawiin Zirlai mai la niin, tunah hian 1st Year BA a zir mek a, “Vawi engzat nge ka chak loh tawh ka chhiar thei lo va, bansan loh hi hlawhtlinna a ni”, a tih thu a sawi. Dinsanga hi Zirlai ni chunga Boxing training a la reng a ni a, a awmna veng, Venghnuai mipuiten an tlin lohna-ah an enrem thin avangin lawmthu a sawi bawk. Dinsanga Coach, Sete-a pawhin Dinsanga tumruh zia sawiin zirna leh sport a kal kawppui mek a, veng chhung tana hun a neih loh thu sawiin boxer te hi vengchhungah kan tel hman lova, kan hunpum hi training nana hman ngai kan ni a, Veng chhung mipuiten enremna mit nena an en a tul tih thu a sawi bawk.
He inkhawma khuallian Dr. Lalmalsawma Nghaka chuan, “Dinsanga hi Profight a khelh atang khan ka lo hmelhriat tawh a, Boxing Coach Sete-a te’n Boxing an kelh lai atanga vawiin thlengin Mizoram Boxing ah hian ka la tel ve zel thei hi a lawmawm ka ti hle. Dinsangan WBC Youth Champion a ni thei hi thil lawmawm tak a ni a, khawvela boxer lar tak takte hi Dinsanga dinhmuna ding thinte a ni.”
“Tunlaiah sport leh zirna hi kalpui thiam hle tur a ni a, lehkha chauh zir ngar ngarte hi limit chin an nei thin a, khawvela mi hlawhtlingte hi sports leh zirna kalpui thiam an ni thin. Balance tawk hriat a, sports leh zirna hi kalpui thiam a ngai hle a, insum theihna leh Pathian hriat tlat hi hlawhtlinna a ni. Dinsanga’n a hlawhtlinna bulpui Pathian a hre reng hi a lawmawm hle.”
“Laldinsanga hi world ranking 120 na vel a ni a, tuna Youth Champion a nih hnuah hian top 80 a kai beisei a ni a. Top 20 vel a thlen hunah World Champion a khel tawh dawn a. A tum ram a thlen theih nan Pathian awmpuina a mamawh hle dawn a, vengchhung mipuite leh Zoram mipui zawng zawng ten kan tawngtai pui a ngai hle a ni,” tiin a sawi.
Ladinsanga hian tun zirtawpni hian LPS Pro-fight ah a championship belt hum turin a in lan leh dawn a ni.
He inkhawm hi Pi Effi Vanlalhmangihi’n tinna hun hmangin mipui pungkhawmte a vai liam a ni.
