BJP chuan vawiin 2nd December, 2024 (Monday) hian karthar inhlanna leh Political Session hun an hmang a, Pu Lalbiaknunga, Ex-Freedom Fighter Chairman-in inkhawm a kaihruai a, Pu Lalchungnunga, State Kisan Morcha, Vice President-in Hunserh hmangin, Pu Vanlalhmuaka, State President in thusawina hun a nei a ni bawk.
Pu Vanlalhmuaka, BJP Mizoram State President chuan, “Ram hruaitua kan thlanchhuahte reng reng hian mi retheite ngaihsak tak takna leh hmangaihna an la nei ngai lova, ramhruaitute hi chuan an hausak phah vek a, nimahsela an hruai mipui, an bial mite erawh chu ding chhuak ta sawi tur kan awm lo hi a vanduaithlakin a pawi takzet a ni,” a ti.
Pu Hmuaka chuan, “Mizote hi Kristian State kan intih laia Central aṭanga min zir tura lo kal ten, min zirchianna aṭanga an hmuh chu Biak In ah nalh tak a inkhawm ṭhin, hnathawhna ah erawh Kristian nihna an senglut lo niin an hmu chu hriat a nuam lo viau mai a, nimahsela min hmuh dan leh kan nihna erawh ngaihtuah chian chuan a nih hmel thung a ni. Kan Politics khelh dan pawh Mipui huapzo Politics ṭha kan khel pha lova, vawiin thleng hian mahni Party mi tlemte chauhin Politics hi anla hlawkpui a ni tih hi a lang chiang a, keini BJP-te erawh chuan mi zawng zawng tan ruahmanna ṭha kan siam ṭhin a, PM Modi Scheme reng reng ah pawh miretheite hamṭhatna tur a tam êm êm tih kan hmuh aṭang pawh hian BJP nih phung chu a chiang hle a ni. Chutiang bawkin State Sorkar ah hian BJP Sorkarna emaw State Sorkar a kan tel ve tak tak na Sorkar nei ni ila chuan BJP hnathawh dan leh mi retheite hmangaihtu kan ni tih a takin kan hmu thei dawn a ni. BJP chu kan thusawi ah kan tawp ve lova, mipui bum nan thu kan sawi ve dawn lo bawk a, kan sawi chhuah tawh ang erawh chu kan ti zel dawn thung a ni tih hi vawiin ah hian Mizoram mipui te hriatah ka sawi duh a ni,” a ti.
Pu Hmuaka chuan sawi chhunzawmin, “Mizoram tan BJP chuan theih tâwp kan chhuah tih hi Mizoram mipuite hian kan la hre ngei dawn a, kan ram tana thil tha tihna kawngah chuan State Sorkar hi theihtâwp chhuahin kan puih bakah puih an ngaih huna puih pawh kan tih theih chinah chuan kan inhuam in kan in hawng tih hi Mizo mipuite’n kan hria in kan la hmu dawn a ni,” a ti.
Pu Vanlalhmuaka chuan, “Mizote hi hnam rinawm ang mai a lang hial ah kan lang mai ang tih te hi a hlauhawm a, achhanchu kan Politician tam takte han en hian mi min hmuh dan leh chhiar dan ani tan mai dawn a, Election dawn ah chauh Loneitute & kuthnathawktute kan hmangaih a, Election dawn ah chauh mi retheite kan hmangaih a, Election zawh hnuah erawh kan hre zui ngai tawh lova, chumai nilovin, mirethei zawk te tawrhna thlen theihna tur dan han siksawi a, rethei te retheihna tih belhchhahna tur pawh kan pawisa ngai tawh thin lo te hi a zahthlak in a pawi hle a ni. Chuvangin kan ram leh kan hnam a chhiat chuan a mawhphurtu chu Mizo te hi kan ni a, achhan chu; Mizoramah Mizote kan tam ber vang a ni, India ram hi a chhia a nih chuan Kristiante mawh ni lovin, Hindu ho mawh a ni, a chhan chu; Hindu ho an tam ber vang a ni. Chuvangin vawiina kan ram hetiang dinhmun a harsa taka kan awm na chhan hi kan bul vela hnam tlem zawk te vang nilovin, Mizote hian kan mawhphurhna ani tih hria a, kan ram leh hnam dinchhuah leh nan rilru fim tak nen mawhphurhna kan nei ani tih ngaihtuah chung a hma la turin Mizoram mipuite ka sawm che u a ni,” a ti bawk.
